Никој не остана имун на хаосот што пандемијата со коронавирусот го предизвика во целиот свет од 2020 година. Се наоѓаме во една од најголемите пандемии во историјата на човештвото, а од коронавирусот и неговите варијанти сѐ уште заболуваат милиони луѓе ширум светот.

Досега пет варијанти на коронавирусот се означени како загрижувачки: Алфа, бета, гама, делта и омикрон.

Варијантата алфа првпат е откриена во Велика Британија во септември 2020 година, според податоците на Светската здравствена организација (СЗО). Варијантата бета е изолирана во Јужноафриканската Република во мај истата година, а високозаразната варијанта гама е откриена во Бразил во ноември 2020 година.

Овие три загрижувачки варијанти на коронавирусот имаат неколку заеднички мутации. Меѓутоа, четвртиот сој, делта, или супер-алфа, како што уште го нарекуваат истражувачите, има 60 отсто поголема заразноста од сојот алфа. Тој е откриен во Индија во октомври 2020 година.

Сојот омикрон, откриен во ноември минатата година, содржи повеќе мутации од останатите варијанти и со тоа е најзаразниот од досега откриените соеви.

За СЗО, потенцијално загрижувачки соеви се уште и Ламбда и Му.

Напис од списанието „Природа“ (Nature) го цитира еволуцискиот биолог Џеси Блум, кој вели дека овој нов патоген нема да исчезне. Тој ќе стане ендемичен и ќе продолжи да циркулира меѓу населението.
На темата за агресивните мутации на овој вирус и благата клиничка слика што ја предизвикува омикрон, еволуцискиот биолог Ендру Рамбо од Универзитетот во Единбург вели дека очекувањата дека новите варијанти ќе бидат уште поблаги се по малку мит. Реалноста е многу покомплицирана од тоа.

СЗО ги повикува сите да ги следат мерките за заштита од ковид-19 за да се намали ширењето на сегашните, но и на идните варијанти на вирусот.

Експертката на СЗО, Марија Ван Керхове, вели: „Омикрон нема да биде последната варијанта за која ќе се зборува и можноста за создавање нови варијанти е многу реална, за што сме загрижени. Нови варијанти ќе продолжат да се појавуваат, а засега не знаеме какви ќе бидат нивните карактеристики“.

„Сигурно е дека ќе бидат позаразни бидејќи мораат да ги „истуркаат“ варијантите кои во моментот циркулираат. Тие можат да предизвикаат посериозна или помалку опасна болест, но исто така може да покажат и способност за избегнување на имунолошкиот одговор. Дефинитивно сакаме да го намалиме ризикот од создавање нови загрижувачки варијанти“, додава експертката.