Руската армија продолжува да го напаѓа уништениот источен украински град Бахмут и да го гранатира Херсон, град на југот на земјата, соопштија властите во Киев. Повеќе од една година по почетокот на инвазијата, Русија го гледа Бахмут како клучен град во нејзиното бавно напредување низ источна Украина.

Украинската заменик-министерка за одбрана Хана Маљар на Телеграм напиша дека во сите делови на источното бојно поле се водат тешки борби, додавајќи дека нападите биле одбиени на повеќето места.

„Повеќето непријателски напади се случуваат во областа Бахмут“, напиша таа, додавајќи дека руските команданти ги пренасочиле војниците во други области. „Непријателот користи поголем дел од професионалните единици таму и прибегнува кон тешки артилериски и воздушни напади. Секој ден непријателот спроведува меѓу 40 и 50 операции и 500 гранатирања во Бахмут“, додаде таа.

Командантот на руската платеничка група Вагнер оваа недела изјави дека неговите сили држат 80 отсто од Бахмут, но украинската војска рече дека тој број е претеран. Украинскиот претседател Володимир Зеленски и други високи функционери бараат од сојузниците повеќе оружје со кое Киев се надева дека ќе започне голема контраофанзива.

Украинските власти се фокусирани на масовната реконструкција што ќе биде потребна, како и на докажувањето на сојузниците дека напредуваат во борбата против корупцијата. Премиерот Денис Шмихал во Вашингтон вети дека ќе биде одговорен за секој долар американска помош, додавајќи дека реконструкцијата треба да започне оваа година.

Покрај тоа, украинските власти бараат членство во НАТО, што Москва јасно стави до знаење дека нема да го прифати. „Нема алтернатива за влезот на Украина во НАТО“, изјави украинскиот министер за одбрана Олексеј Резников на безбедносната конференција за Црното Море.