Шпанскиот премиер Педро Санчез денеска објави дека неговата влада ќе воведе нови мерки против Израел, меѓу кои и забрана за пристанување на бродови и прелетување на авиони што транспортираат оружје наменето за Израел.

Во обраќање емитувано на локалната телевизија, Санчез најави и зголемена финансиска поддршка за Палестинската самоуправа и Агенцијата на ОН за помош и работа со палестинските бегалци (UNRWA), како и ембарго за производи што доаѓаат од израелските населби на окупираните палестински територии, пренесува Гардијан.

„Се надеваме дека ова ќе послужи како дополнителен притисок врз премиерот Нетанјаху и неговата влада за да се ублажат страдањата на палестинскиот народ“, изјави Санчез.

Покрај тоа, тој соопшти дека на територијата на Шпанија ќе биде забранет влез за сите лица кои директно учествувале во, како што го нарече, „геноцидот“ во Појасот Газа.