Фудбалските натпревари во Шпанија од петок би требало да се играат пред полни трибини, објави шпанското министерство за здравство.

Денеска беше одржан состанок на Министерството со 17 автономни покраини на кои едногласно беше договорено проширување на капацитетот од сегашните 60 проценти.
Шпанија во март 2020 година комплетно ги затвори стадионите и салите поради пандемијата на коронавирусот поради која во државата со 47 милиони жители, околу пет милиони беа заразени, а починаа околу 86.000 жители.

На почетокот од оваа година, Владата дозволи ограничен број на гледачи на трибините, но мораше да се носат заштитни маски и да се одржува растојание меѓу нив.
Министерството за здравство на Шпанија денеска објави дека 76.9 проценти од граѓаните се вакцинирани, што доведе до олабавување на мерките.

Во салите каде се играат ракометни и кошаркарски натпревари дозволено беше присуство на навивачи до 40 проценти од капацитетот на салите, додека од петок тој процент ќе се зголеми до 80 проценти.

Ла Лига со екипи како Реал Мадрид, Барселона и Атлетико Мадрид е една од најгледните во светот, а клубовите се жалеа на голем пад на приходите поради затворените стадиони и сигурно е дека најновата мерка на шпанската влада ќе им биде од голема корист.