Мајка на две деца вели дека животот ѝ се променил целосно кога направила ДНК тест за потекло кој открил шокантна вистина за нејзиниот сопруг.

Имено, таа купила ДНК тест за потекло од љубопитност, мислејќи дека ќе биде забавно и дека можеби ќе дознае повеќе за нивните семејства. Сепак, тестот открил нешто што ниту таа ниту нејзиниот сопруг не можеле да го замислат: дека тие всушност се крвни роднини, пишува „Дејли мејл“.

Во објава што брзо стана вирална на „Редит“, жената ја раскажала својата неверојатна приказна. Знаејќи дека е зачната со употреба на донорска сперма, резултатите од тестот не ја изненадиле многу, сè додека не открила чија ДНК се совпаѓа.

„Се испостави дека сме поврзани на начин на кој никогаш не можевме да замислиме – мојот сопруг и јас сме полубрат и полусестра“, напишала таа.

Двајцата биле длабоко потресени кога дознале дека имаат ист биолошки татко. Нејзиниот сопруг целиот свој живот верувал дека е зачнат природно, несвесен дека и тој е дете од донор.

„На почетокот мислев дека е грешка или дека погрешно сум прочитала нешто, но откако проверивме сè детално, сфативме дека и неговиот татко е всушност донор, иако никој никогаш не му кажал. Со години сме во брак, имаме две деца и сè уште се обидуваме да сфатиме како да живееме со фактот дека сме полубрат и полусестра“, рекла жената.

Потоа објаснила како се чувствувала по ова откритие.

„Не знам ни како да ги објаснам моите чувства. Ова е премногу за да се поднесе. Секако дека го сакам, но ова целосно ја менува нашата ситуација. Се чувствувам изгубено. Веќе разговаравме со специјалист и се обидуваме да продолжиме понатаму, но сега сè е поинаку“, додала таа.

Инаку, постапката за ДНК тестот е многу едноставна – корисникот испраќа примерок од плунка во епрувета назад во лабораторијата. Тестот анализира околу 700.000 специфични точки во вашата ДНК кои можат да откријат важни информации за вашето потекло. Потоа овие податоци се споредуваат со примероци од луѓе од повеќе од 350 региони низ целиот свет, области каде што специфични генетски обрасци се развиле со генерации. Тестот потоа ги споредува вашите гени со овие обрасци и проценува од кои делови од светот потекнуваат вашите предци.