Стопанската комора на Македонија сака да ги пресретне идните чекори на Владата и да не се дозволи Законот за солидарен данок да биде донесен по скратена постапка и со европско знаменце. Владата го послуша гласот на бизнисот и во средата ги повлекла законите за ДДВ, за добивка и за солидарен данок, но со тоа е задоволен само првиот дел од барањето на СКСМ и затоа претседателот Бранко Азески апелира сосема да биде запрена натамошната процедура и во заеднички консултациите со бизнис заедницата да се дојде до најдоброто решение.

-Ние не можеме да штрајкуваме. Нудиме дијалог за кој веруваме дека Владата ќе има слух – одговори Азески на новинарско прашање што ако сепак законот биде донесен. Ад-хок носењето на ваков данок, во втората половина на деловната година, создава несигурност кај постојните и потенцијалните инвеститори, дециден е Зоран Јовановски, потпретседател на СКСМ. Според Клубот 100, „јасна е намерата на Владата дека овој закон сака да го протне со европско знаме, кој ќе нанесе поголема штета, одошто добро“.

-Законот е селективен и се однесува само на компаниите кои остваруват приход поголем од 615 милиони денари (10 милиони евра), се врши оданчување на добивката независно дали таа е резултат на пазарните услови или е резултат на зголемени инвестиции и продуктивност, а тоа ги дестимулира успешните компании – посочи Јовановски.

Според Извршниот директор Антони Пешев, бизнисот не слушнал никакво образложение дека некоја фирма ја нарушила монополската позиција на пазарот за да се оданочува „солидарно“.

-Најголемиот дел од комапниите кои ќе бидат погодени од законот се странски и за нив тој е неразбирлив, непредвидлив и ненајавено ретроактивен. Тоа ви е исто како да играте натпревар во во првото полувреме владеат, едни, а во другото полувреме сосема други правила – пластично објасни Пешев. Според него постои уште една дилема без одговор – ако законот има социјална димензија, каде е програмата според која ќе се распределуваат и трошат собраните пари?

Владата пресмета дека од овој данок ќе собере 90 милиони евра од околу 200 компании кои оствариле вкупен приход од над 10 милиони евра и чиј профит е поголем од 20 отсто во однос на четиригодишниот просек.