Рускиот заменик-министер за надворешни работи Сергеј Рјабков денес изјави дека „моментумот“ што состанокот на рускиот и американскиот претседател во Алјаска го даде на украинското решение е „во голема мера исцрпен“ поради активностите на европските земји.

„За жал, мора да признаеме дека силниот импулс што го генерираше Анкориџ во корист на договорот е во голема мера исцрпен од напорите на противниците и напорите на Европејците кои ја поддржуваат војната до последниот Украинец. Ова е резултат на деструктивна активност, првенствено од Европејците, за што зборуваме отворено и директно“, рече Рјабков, објави РИА Новости.

Рјабков, исто така, рече дека испораката на крстосувачките ракети „томахавк“ на Украина би претставувала „квалитативна промена на ситуацијата“, но дека тоа нема да влијае на целите на „специјалната воена операција на Русија“.

Рјабков го повика Вашингтон да заземе „разумен и одговорен“ пристап кон прашањето за испорака на вакви системи во Киев, предупредувајќи дека хипотетичката употреба на ракети може да бара директно учество на американски персонал и дека последиците би биле сериозни, објави ТАСС.

„Се надеваме дека оние кои вршат притисок врз американското раководство се свесни за длабочината и сериозноста на последиците. Очекуваме САД да дејствуваат промислено“, им рече Рјабков на новинарите.

Зборувајќи за продолжувањето на Новиот договор СТАРТ, Рјабков истакна дека Москва доставила предлог до САД, но сè уште не добила суштински одговор.
Русија предлага Вашингтон да се воздржи од потези поврзани со стратешката ракетна одбрана што би можеле да се сфатат како обид за влијание врз потенцијалот на Русија за нуклеарно одвраќање.