Русија сака да се врати во Советот за човекови права на Обединетите нации, откако беше исфрлена во април минатата година поради инвазијата на Украина.

Москва е наведена на веб-страницата на Обединетите нации како кандидат за избор на членови на Советот за човекови права за мандатот 2024-2026 година, што треба да се одржи на 10 октомври, пренесува Индекс.

Членството се базира на географска распределба, со две слободни места во групата на источноевропски земји, а досега за тој регион кандидатура ја најавија Русија, Албанија и Бугарија.

Во документот испратен до членките на ОН, кој го објави Си-Ен-Ен, Русија наведе дека го смета Советот за човекови права за клучно тело во системот на Обединетите нации.

Официјална Москва вели дека е важно да се спречи растечкиот тренд на претворање на Советот за човекови права во инструмент кој служи на политичката волја на група земји и ги казнува нелојалните влади за нивната независна внатрешна и надворешна политика.

Генералното собрание на Обединетите нации гласаше за суспендирање на Русија од Советот за човекови права во април 2022 година.