На денешен ден, 8 јуни 1940 година, во Џерси Сити е родена Ненси Синатра – најстарата ќерка на славниот Френк Синатра и неговата прва сопруга, Ненси Барбато. Иако растела во светот на слава и луксуз, патот до нејзината независна кариера не бил ниту лесен ниту брз, пишува „Стори“.

Уште од најрана возраст, Ненси чекорела по стапките на својот татко. Учела клавир, пеела, посетувала часови по глума и танц, а детството го поминала во Лос Анџелес, опкружена со славни и успешни личности.

Во 1957 година за првпат се појавила во емисијата „Френк Синатра шоу“, а три години подоцна повторно настапила, овој пат со задача да го пречека Елвис Присли по неговото враќање од воена служба. Во таа прилика, заедно со татко ѝ ја отпеале песната „You Make Me Feel So Young/Old“, што се смета за нејзино деби на музичката сцена.

Иако во 1961 година потпишала договор со издавачката куќа „Рипрајс рекордс“, првите неколку синглови не постигнале значаен успех во Америка, иако биле добро прифатени во Европа и Јапонија. До 1965 година сѐ уште немала американски хит, поради што се соочувала со можноста да ѝ биде раскинат договорот.

Во тој период, била мажена со пејачот и актер Томи Сендс, но нивниот брак траел само до 1965 година. По разводот, кружеле гласини дека нејзиниот татко го ставил Сендс на „црна листа“ во шоу-бизнисот, што и двајцата го негирале. Ненси подоцна изјавила дека била премлада и наивна и дека се омажила затоа што во тоа време било нормално да се биде во брак за да се има интимни односи.

Токму тогаш, по иницијатива на нејзиниот татко, композиторот Ли Хејзлвуд добил задача да ѝ помогне во кариерата. Тој ѝ ја понудил песната „These Boots Are Made for Walkin’“, која подоцна ќе стане нејзин најголем хит и химна на женската еманципација.

Со целосна трансформација на својот имиџ, руса коса, впечатлива шминка и подлабок вокал, Ненси стана модна и музичка икона на шеесеттите години. Наместо да пее како „добра девојка“, почна да настапува од перспектива на жена што поминала низ развод и животни предизвици.

Како што напиша авторот Џејмс Викерсон: „Ненси беше првата жена која го користеше шармот и сексуалноста на сличен начин како Елвис Присли – самоуверено и со стил“.

Во интервју за „Ајриш тајмс“, Ненси изјавила дека секогаш чувствувала одговорност кон своето презиме и дека морала да биде внимателна, особено во младоста: „Кога ќе направевме некоја глупост како тинејџери, медиумите секогаш ме издвојуваа мене – затоа што бев ќерка на Френк Синатра. Мораше да се внимава секогаш“.

Албумот „Boots“ излезе во 1966 година, неколку месеци по објавувањето на хит-синглот. Во текот на својата кариера, Ненси издаде вкупно 13 самостојни албуми и пет заеднички проекти – со Ли Хејзлвуд, со својот татко, брат и сестра, и со кантри-пејачот Мел Тилис.

И покрај тежината на славното презиме и високите очекувања, Ненси Синатра успеа да изгради цврста, автентична кариера.

Фаталната Ава Гарднер: Најголемата љубов на Френк Синатра и Ернест Хемингвеј