Ревизорите со големи резерви во однос на вистинитоста и објективноста на извештаите за финансиското работење на Фондот за здравство
Големи резерви во однос на вистинитоста и објективноста на извештаите за финансиското работење на Фондот за здравство, изрази Државниот завод за ревизија по извршениот увид во работењето на Фондот во текот на 2021 година, напоменувајќи притоа дека и во однос на препораките дадени во извештајот за 2020 година, само три од нив се во тек на спроведување, три се делумно спроведени и девет препораки не се спроведени.
– Изразивме мислење со резерва во однос на вистинитоста и објективноста на финансиските извештаи и за усогласеноста на финансиските трансакции со релевантна законска регулатива за 2021 година – се потенцира во извештајот.
Меѓу забележаните слабости во работењето на фондот се споменува тоа што од страна на граѓаните за време на пандемијата на ковид-19 биле дадени 19,9 милиони евра за ПЦР тестови кои завршиле во приватното здравство.
– Во услови на пандемија, поради необезбедување на повеќе термини во ЈЗУ и несклучени договори со ПЗУ за дијагностицирање на ковид-19, не се обезбедени доволно здравствени услуги за осигурениците на товар на Фондот – се додава во извештајот.
Утврдено е дека е застарена и амортизирана серверска структура и дека има недостиг на ИТ кадар и стратегија, што пак се потврди деновиве, со хакерскиот напад врз сајтот на ФЗО.
Ревизорите утврдиле слабости во спроведувањето на интерните и теренските контроли при потврдувањето на објективноста на фактурираните услуги.
– Ревизорите во извршената ревизија констатираат слабости во контролите при препишување и издавање лекови, непочитување на роковите при вршењето на контролите и изрекувањето на договорните казни, поради невоспоставени контроли исплатувани се надоместоци за боледување и кога осигурениците остварувале плата, како и слабости при утврдување и контрола на реализација на условен надоместок на ЈЗУ – велат од Државниот завод за ревизија.
Како клучни препораки ДЗР ги посочува воспоставувањето систем на планирање, следење и редовно вршење контрола на видот и обемот на извршените здравствени услуги и издадени рецепти.
Дел од препораките се и доуредувањето на постапката и воспоставување контроли при исплатата на надоместоците за боледување и зајакнување на контролите кај условниот надоместок.