Свети Никола ни е пред врата, а вредните домаќинки веќе одвојуваат рецепти за посна трпеза. Со цел да не се измачувате во потрагата што да подготвите, ние ви нудиме неколку идеи што ќе ви олеснат кога станува збор за салатите.
Ви ги предлагаме овие шест посни салати за предјадење:

Руска (посна) салата

Потребни состојки:

– 2 конзерви сардина
– Посен мајонез
– 4 помали моркови
– 4 кисели краставици
– 1 поголем компир
– 300 г грашок
– Сол, бибер

Подготовка:

Сварете ги и исечкајте ги на коцки компирот, морковите и грашокот, а потоа ситно исечкани додајте ги и киселите краставици и сардините. Посолете и ставете бибер по желба, а потоа додајте го и посниот мајонез откако салатата добро ќе се излади. Салатата, по желба, можете да ја направите и без сардина.

Макало од компири, суви пиперки, праз

Потребни состојки:

– неколку компири
– неколку суви пиперки
– праз
– сол
– зејтин

Подготовка:

Компирите се варат и се пасираат, а сувите пиперки се варат. Празот се сечка ситно и треба да се истолчи малку со сол. Од сувите пиперки со лажиче се собира месото под лушпата и се толчи. Компирите, празот и пиперките се мешаат, се ставаат зачини по желба. Може да се додаде зејтин, прво да се изврие и да се прелие смесата.

Макало од модри патлиџани

Потребни состојки:

– 1 печен модар патлиџан
– 2-3 чешниња лук
– магдонос
– ореви (по вкус)
– сол, бибер
– маслиново масло
– маслинка за украсување

Подготовка:

Модриот патлиџан, се лупи и се гмечи со виљушка. Модриот патлиџан се става во еден сад и му се додаваат сол, маслиново масло, ситно сечкани лук, ореви и магдонос и се меша се убаво. Се украсува со маслинка.

Салата со сенф

Потребни состојки:

– 3 моркови
– 4 компири со средна големина
– 10 кисели краставици
– 1 полна лажица сенф
– 2 лажици масло
– 1 лажица оцет
– Малку шеќер
– Сол
– Бибер

Подготовка:

Сварете ги морковите и компирите во солена вода, потоа исцедете ги и исечкајте ги на ситни коцки. Краставиците, исто така, исечкајте ги и додадете ги во компирите и морковите.
Претходно добро измешајте ги оцетот, шеќерот, маслото и сенфот и додадете ги откако варените компири и моркови добро ќе се оладат.

Шарена салата

Потребни состојки:

– 300 г интегрален ориз
– 100 г грашок или боранија
– 100 г млади тиквички
– 1 зелена пиперка
– 1 црвена пиперка
– 2 моркови
– Чешне лук
– Малку магдонос
– Сок од половина лимон
– 100 г кисели краставички
– Бибер
– Сол

Подготовка:

Во зовриена вода ставете ги тиквичките, пиперката и морковите исечкани на коцки, а потоа и грашокот и белиот лук. А, потоа и оризот, сокот од лимон и зачините. Варете 15 до 20 минути додека не се свари оризот, а потоа додадете ги и исечканите кисели краставици. На крајот можете да додадете и малку ореви.

Салата со компири

Потребни состојки:

– 1 кг компири
– 2 црвени кисели пиперки
– 3-4 кисели краставички
– 2 главици црвен кромид
– вегета
– сол
– магдонос
– оцет

Подготовка:

Се варат компирите сосе лушпата, па додека се топли се лупат и се сечат ситно. Во посебен сад се сече кромидот, се посолува и се ситни со виљушка. Се додаваат две сечкани кисели црвени пиперки, 3-4 кисели краставички, како и зачините и магдонос, па сè убаво се меша. Се става масло и оцет и се додава смесата на компирот. Промешајте и сервирајте декорирано по желба.