Полската влада соопшти дека два белоруски хеликоптери денеска го нарушиле полскиот воздушен простор. Варшава најави дека ќе го зголеми своето воено присуство долж границата и дека во знак на протест го повикала амбасадорот на Белорусија на информативен разговор.

За инцидентот е известен и НАТО, соопшти Министерството за одбрана.

Во Полска и соседна Литванија изманитиов период постои загриженост откако платеници од руската група Вагнер пристигнаа во Белорусија по нивниот краткотраен бунт против Кремљ во јуни.

Денеска, жителите на Полска во област во близина на границата со Белорусија пријавиле дека виделе хеликоптери со белоруски ознаки за кои рекле дека им летале над главата.

Вечерва Министерството за одбрана на Белорусија призна дека „дошло до нарушување на полскиот воздушен простор од два хеликоптери кои вршат обука во близина на границата“.

Се додава дека Белорусија претходно ја известила Полска за плановите за спроведување на вежби во областа.

Како одговор на упадот, министерот за одбрана Мариус Блажчак нареди зголемување на бројот на војници долж границата, како и зголемување на бројот на борбени хеликоптери.

Министерството за надворешни работи соопшти дека „упатиле цврст протест и ја повикаа белоруската страна веднаш и темелно да го објасни инцидентот“.