Екипата на Еурофарм Пелистер го претрпе вториот пораз сезонава во ракометната ЕХФ Европска лига откако во Битола убедливо загубија од фаворитот во групата „Д“, Фуксе Берлин (34:43).

Тренерот на македонскиот вицешампион, Ларс Валтер истакна дека неговите играчи имале добар старт на средбата, но потоа се соочија со доста проблеми со враќањето во одбрана.

– Имавме проблеми со враќањето во одбрана, тоа ни се случува вторпат сезонава и затоа мораме да извлечеме поуки. Во вториот дел се покажавме во подобро светло, не се предававме иако ни фалеа неколку ракометари. Да, тоа е точно дека голманот на Фуксе Берлин одбрани многу топки, но и ние не реализиравме многу зицери – рече Валтер на прес-конференцијата по натпреварот.

Капитенот на битолскиот состав, Црногорецот Мирко Радовиќ по мечот во салата „Боро Чурлевски“ им ја честиташе победата на Германците на одличниот натпревар.

– Примивме премногу лесни голови, не барам изговор, но ни недостастуваат играчи во ротацијата. А против тим како Фуксе Берлин потребни ни се сите 16 играчи, како и оваа прекрасна атмосфера што ја имавме во салата. Се боревме до крај, тоа беше нашиот максимум. Сигурен сум дека ќе извлечеме поука од овој натпревар, да научиме, и веќе да се подготвуваме за следните мечеви во домашното првенство и во Европа – рече Радовиќ.

Следниот предизвик тимот на Ларс Валтер во ова натпреварување ќе го имаат на 29 ноември во Дизелдорф, Германија, против украинскиот Мотор Запорожје.