Бугарскиот адвокат Николај Хаџигенов, еден од организаторите на протестите во Софија, денеска повика на масовен протест во понеделник пред парламентот, како и блокирање на судовите, јавните згради, патиштата низ државата, јавува бугарската агенција БТА.

„Во понеделник, во 7 часот наутро, треба се да затвориме, сите да излеземе надвор. Времето ќе биде топло, земете си и храна, порача тој.

Според него никој од владата нема доброволно да си поднесе оставка.

„Единствен начин да се симне диктатор како Борисов е со сила“, вели тој. Според адвокатот, гласањето за недоверба на владата нема да промени ништо за граѓаните.

Хаџигенов ги повика граѓаните на мирни протести низ земјата, да сликаат и да покажат на социјалните мрежи. „Ова ни е последна шанса да ги избркаме сите. Секој може да ја покаже својата фантазија, бидете слободни и чувствувајте се како граѓани за првпат“, додаде тој.

„Сакаме Бугарија да биде зелена, а нашите реки се загадени. Сакаме администрацијата да биде модерна, ама имаме 30 кукли на шалтер, а еден компјутер. Сакаме да не си го трошиме времето и да ни земаат три пати повеќе пари за истата работа“, вели Арман Бабикјан, еден од организаторите.

Илјадници демонстранти ја пееја бугарската химна на плоштадот во Софија и извикуваат „Оставка“, „Надвор“ и „Секој ден ќе ви биде ваков додека не си дадете оставка“. Демонстрани денеска има видливо помалку од другите денови. Нема ниту протестен марш во центарот вечерва, објави бугарската агенција БТА.