По три недели откако исчезна помагајќи на екипа на ЕВН, денеска е пронајдено телото на Спасе Димовски, кого поројница го однесе во селото Белештевица. Неговото тело е пронајдено во близина на вливот на Бабуна во Вардар, низводно од Велес, а член на потесното семејство потврди дека станува збор за Димовски.

Телото на Димовски било забележано претпладнево како плови по Вардар низ Велес, по што екипа за спасување и безбедност при општинскиот Црвен крст тргнала во потрага со чамец на територијалната противпожарна единица.

Спасе Димовски исчезна на 6 август околу 14:47 часот кај село Белештевица, Велешко, кога со неговиот трактор им помагал на екипи на ЕВН да се извлечат од кал. По телото се трагаше три седмици по течението на Вардар, од вливот на Пчиња, па до Ногаевци.