Промовирани обележаните планинско – велосипедски патеки на Попова Шапка
Здружение „Планинарски клуб Шара Ски – Тетово“ денеска ги промовираше обележаните крос-кантри планинско-велосипедски патеки на Попова Шапка.
– Примарна цел на Проектот е маркирање и обележување на постоечките крос- кантри планинско-велосипедски патеки на Попова Шапка. Секундарни цели на Проектот се подобрување на атракциско – мотивациските фактори и туристичката понуда, со цел зголемување на туристичкиот прилив по основ на туристички доаѓања, како и развој на туризмот на Попова Шапка – велат од здружението
Тие додаваат дека преку подготовка на флаери, брошури на македонски, англиски, албански и германски јазик, целта им е запознавање на туристите со крос-кантри патеките на Попова Шапка.
– Инфо – пакетот содржи информации за името, локацијата и должината на крос-кантри патеките, како и висинската разлика, потребното време за возење на секоја од патеките, инфраструктурните објекти долж патеката и слично. Промовирано е и видео за маркацијата и за карактеристиките на крос-кантри планинско-велосипедските патеки на Попова Шапка“ – истакнаа од Здружението „Планинарски клуб Шара ски“ – Тетово.
Со Проектот се обновени и дополнети постоечките маркации на патеките, подготвени и поставени се патокази, маркирани се патеките со ГПС уред, впишани се координати и карактеристики на патеките, одредени се места за почетна и крајна точка на патеките, пауза долж патеката, исцрани се мапи од секоја патека со сите поодатоци. Овие места се поставени и пред платото на терасата на комплексот „ Конак“, од каде се почетните точки на рутите.
– Проектот е придонес кон групирање на едно место на туристичките потенцијали на крос-кантри планинско-велосипедските патеки со кои располага Шар Планина, како придонес кон атракциско – мотивациските фактори на Шапка – констатираат од „Планинарскиот клуб Шара Ски – Тетово“.