На покана од професори пијанисти од Истанбул, професорката и пијанистка м-р Даница Стојанова одржа мастерклас за млади уметници во Истанбул, а во истата пригода се претстави и со целовечерен пијано-рецитал.

Мастеркласот се одржа со отворена покана за учество на сите млади уметници што сакаат да научат нешто повеќе за мајсторството, слушањето и интерпретирањето на класичната музика на еден од најмоќните инструменти – пијаното.

На работниот семинар учествуваа 11 пијанисти, од кои 10 студенти од Конзерваториумот на државниот универзитет за убави уметности „Мимар Синан“, од Конзерваториумот на државниот универзитет во Истанбул, од Конзерваториумот на универзитетот „Малтепе“, како и ученици од неколку приватни професионални студија за пијано.

– Семинарот се одржа во студиото „Сандалчи“ во европскиот дел од градот. Учениците беа на возраст од 7 до 18 години. Неколкумина ги знам од минатите години, затоа што ова беше мојот четврти мастерклас во Турција. Беше прекрасно да ги споделам сите мои знаења и чувства кон уметноста, воопшто, а како главна и примарна беше работата и интерпретацијата на пијаното низ делата од мајсторите на класичната музика низ вековите. Самата јас имам завршено и научено најмногу на мастеркласови низ светот, каде што во активни седум дена добиваш искуство и енергија што е незаборавна.

Младите уметници од Истанбул на завршниот концерт, кој се одржа во црквата „All Saints Moda Klisesi“ во Кадикој од азискиот дел на Истанбул, се претставија со дела од Менделсон, Моцарт, Рахмањинов, Бах, Прокофиев, Клементи, Хајдн, Шопен. Во 60 минути ни раскажаа возбудлива музичка приказна и нѐ пренесоа во универзумот како имагинација полна со светла енергија, виртуозност, боја и љубов. Тие се толку млади, а толку благословени и талентирани. Затоа треба овие деца да ги чуваме како дијаманти – вели Даница Стојанова по враќањето од Турција.

За време на престојот во Истанбул Даница Стојанова имаше можност да одржи солистички концерт, кој беше поддржан од Општина Струмица.

– Мојата идеја за овој концерт беше под наслов „Македонска сага“ и одлучив да настапам само со дела од мајсторите на класичното македонско творештво Томислав Зографски, Благој Цанев и Јана Андреевска. Концертот се одржа на 6 јули во галеријата на концертниот простор „Сандалчи“ во Истанбул. Kонцертната вечер ја започнав тивко со Импровизацијата во Цис од Зографски, па со колоритната неокласична Свита ја завршив мојата интродукција на концертот.

Преку „A simple song of tenderness“ на Јана Андреевска се пренесов во момент исполнет со пејзажи од хармонии во боја, а во продолжение беа ритмично блескавите Минијатури за да направам еден пресек и преку Фолклорната свита од Б. Цанев публиката ја пренесов во светиниколските полиња, каде се слуша изворната македонска песна од тоа поднебје. Со „Apricity“, каде што расположението во композицијата е тотален опозит од фолклорот, интерпретирав сончеви ноти кои те галат со милозвучниот љубовен џез.

Концертот го завршив со брилијантните десет Минијатури оп. 6 од Т. Зографски. На концертот како гости се претставија младите и надежни пијанисти Јаз Акај и Рузгар Дениз Билен, кои настапија со дела од М. Мошковски и С. Прокофјев. Отсекогаш сум била иницијатор и поддржувач на млади уметници што заслужуваат да бидат претставени во јавноста, така што овие две ѕвезди прекрасно се вклопија во 45-минутниот концертен мозаик.

Да бидам искрена, малку стравував за приемот на програмата од публиката, но сѐ беше перфектно. Најголем интерес публиката имаше за познатата Суита од Т. Зографски, „Овчеполска“ од Б. Цанев и „Apricity“ од Ј. Андреевска.

Благодарам на сите за честа и љубовта што ми ја дадоа. Истанбул во моето срце ќе остане засекогаш со надеж дека наскоро ќе се вратам пак – истакнува Стојанова.

(Текстот е објавен во „Културен печат“ број 289, во печатеното издание на весникот „Слободен печат“ на 12-13.7.2025)