Прличеви беседи 2021: Достојно чествување на патронот
Националната установа Библиотека „Григор Прличев“ од Охрид и во услови на пандемија на ковид-19 вложи напори достојно да ја чествува 128-годишнината од смртта на патронот Григор Прличев и 160-годишнината од создавањето на неговата поема „Скендербег“.
Настанот на 5 февруари беше отворен со изложба на ликовни дела од колекцијата на Центарот за култура, а точно напладне се одржа свеченоста посветена на лауреатот на наградата за најдобра поема за 2020 година – Лилјана Пандева. Нејзината поема „Капетаните“ беше прогласена за најдобра на конкурсот што секоја година се распишува во чест на Прличев.
Во чест на големиот поет и преродбеник Прличев беше промовирана и најновата книга на проф. д-р Вера Сточевска-Антиќ „За Прличев и неговиот XIX век“, во која како приредувач се јавува м-р Милчо Јованоски. Книгата содржи 12 трудови од д-р Стојчевска-Антиќ и 13 автографски записи, документи, мислења од м-р Милчо Јованоски, кој изнесува податоци и слики за куќата и гробот на Григор Прличев, за семејното стебло, за најстарите македонски изданија на негови значајни дела, филмови за Прличев и ред негови мисли. Издавач на книгата е Библиотека „Григор Прличев“ со финансиска помош од Министерството за култура и Општина Охрид.
Во чест на патрониот празник, библиотеката на својот сајт објави документарна снимка од архивата на МТВ – ТВ Скопје од „Прличеви беседи“ во 1968 година, како и аудиоизданија на „Сердарот“ и „ Автобиографија“, кои се дел од архивираниот серијал „Звучна библиотека“, проект поддржан од Министерството за култура, а реализиран од охридската библиотека.
(Текстот е објавен во „Културен печат“ број 67, во печатеното издание на „Слободен печат“ на 6-7 февруари 2021)