Во една неочекувано интимна епизода од серијалот „Патувачот што не сака да патува“ (The Reluctant Traveler) со Јуџин Леви, принцот Вилијам го „сруши ѕидот“ на формалноста и зборуваше за најтешката година во животот, семејните предизвици, растењето со немилосрдните медиуми и тоа каков крал сака да биде – оној кој воведува промени „на подобро“, без повторување на грешките од минатото.

Едно е сигурно. Вака искрен принцот Вилијам досега не сме имале можност да видиме, но актерот Јуџин Леви, кого го паметиме од „Американска пита“ (American Pie), успеа во невозможното – да го „отвори“ идниот крал и да го „натера“ да открие детали за себе за кои досега не зборувал.

Магазинот „Пипл“ го преслуша целиот разговор и потоа ги наброја работите кои се највпечатливи во интервјуто на Вилијам, во кое, меѓу другото, вели дека кога ќе стане крал ќе донесе „позитивни промени“ во монархијата, но и дека нема да ги повтори „грешките“ од минатото.

Му недостига баба му, но во Виндзор ја „чувствува“

„Ми недостигаат баба ми и дедо ми. Се случија многу промени, па често размислувам за тоа што ги нема, особено кога сум во Виндзор. За мене, Виндзор е таа. Сакаше да престојува овде. Поголемиот дел од времето го помина тука“, рекол Вилијам.

„Имавме добар однос. Моите баба и дедо беа од друга генерација. Мислам дека додека бевме помлади, беше потешко да имаме толку близок однос бидејќи беше прилично формален, но како што тие старееја, а јас растев, стануваше сѐ потопло, и дефинитивно мислам дека мојот однос со баба ми и дедо ми беше најдобар кога беа во нивните осумдесетти. Кога донекаде се опуштија.“

2024 година била најтешката во неговиот живот

Во март 2024 година, Кејт јавно ја објави својата дијагноза за рак и, по хемотерапијата, принцезата од Велс откри дека ракот ѝ е во ремисија. На кралот Чарлс му беше дијагностициран карцином во февруари 2024 година, а за двете дијагнози решија деталите да ги задржат за себе.

„Би рекол дека 2024 година беше најтешката година што сум ја имал досега“, признава Вилијам.

„Се обидував да ги усогласам сите и да ги заштитам децата, Кетрин… и на татко ми му требаше малку заштита, но, знаете, тој е доволно стар да го направи тоа сам. Но, важно е моето семејство да се чувствува заштитено и да има доволно простор да го обработи сѐ што се случи минатата година, а тоа беше напорно. Но, знаете, сите имаме предизвици кои ни се случуваат, и важно е да продолжиме. Така што, знаете, уживам во мојата работа, но понекогаш има аспекти, како што се медиумите, шпекулациите, преиспитувањата, кои ја прават малку потешка од другите работи. Се работи само за тоа да се осигуриме дека тоа нема да преземе власт и да навлезе во подрачја во време кога едноставно сакате малку простор, малку мир и тишина.“

Горд е на Кејт и Чарлс поради нивната сила

Зборувајќи за сопругата и таткото, Вилијам не се воздржуваше: „Знаете, животот ни е испратен да нè тестира исто така, и дефинитивно може да биде предизвикувачки понекогаш, и способноста да се надмине тоа е она што нè прави тоа што сме. Знаете, толку сум горд на мојата сопруга и татко ми поради начинот на кој се справија со минатата година. Моите деца исто така одлично се снајдоа.“

Семејството и стресот

За Вилијам, круната не е она кон што најмногу тежнее, туку семејството.

„Работите што се однесуваат на семејството прилично ме преплавуваат. Грижата или стресот околу семејните работи прилично ме преплавува. Но, што се однесува до извршувањето на работата и слични работи, не се чувствувам премногу преоптоварен со тоа… Кога се работи за семејството и слични работи, тука почнувам да бидам малку преоптоварен, како што мислам дека би биле повеќето луѓе, бидејќи тоа е полично, има повеќе чувства, повеќе го нарушува ритамот.“

Не сака да ги повтори грешките на своите родители и траумата од разводот

Во редок коментар за болниот развод на неговите родители, принцезата Дијана и Чарлс, Вилијам рече дека тоа оставило трајно влијание.

„Мора да ја имате таа топлина, тоа чувство на сигурност, љубов. Сето тоа мора да биде таму, и тоа сигурно беше, барем дел од моето детство. Моите родители се разведоа кога имав 8 години, така што тоа траеше кратко време. Но, го земате тоа и учите од тоа и се обидувате да се погрижите да не ги направите истите грешки како вашите родители. Мислам дека сите се обидуваме да го правиме тоа и само сакам да го направам она што е најдобро за моите деца, но знам дека драмата и стресот кога сте мали навистина влијаат на вас кога сте постари.“

Кејт е во ремисија и ‘сѐ напредува како што треба

На прашањето на Леви како се неговата сопруга и татко му среде нивните борби против ракот, тој рече: „Да, работите се добри. Сѐ напредува на вистински начин, што се добри вести.“

Леви потоа продолжи и праша дали тоа значи дека Кејт сега е во ремисија, на што Вилијам вели: „Да, е да… Тоа се одлични вести.“

Како Џорџ, Шарлот и Луис минуваат низ борбата на Кејт против ракот

„Секој има свои механизми за справување со такви работи, а децата постојано учат и се прилагодуваат. Се обидуваме да им ја обезбедиме сигурноста што им е потребна. И ние сме многу отворено семејство, па разговараме за работите кои нè мачат и кои нè загрижуваат, но никогаш не знаете какви последици тоа може да има. Затоа е важно да бидеме тука еден за друг и да ги уверуваме децата дека сѐ е во ред.“

Сфатил дека здравјето е единственото нешто што е важно

Вилијам признава дека бил шокиран од тоа колку брзо животот може да се промени кога ќе се појави болест. „Бевме многу среќни; немавме многу болести во семејството многу долго време. Моите баба и дедо живееја до доцните деведесетти. Така што тие беа визија за кондиција, стоицизам и отпорност, ако сакате. Така што бевме многу среќни како семејство. Но, мислам дека кога одеднаш ќе сфатите дека тој метафоричен тепих може да ви биде извлечен под нозете прилично брзо во кој било момент. Можеби ќе помислите: ‘Нема да ни се случи, ќе бидеме добро’, бидејќи мислам дека секој има позитивен поглед. Мора да бидете позитивни. Но, кога тоа ќе ви се случи, тогаш да, тоа ве одведува на некои прилично лоши места.“

Принцот се заколнал дека ќе го заштити своето семејство од медиумскиот надзор по она што им се случи на неговите родители.

Размислувајќи за борбите на Чарлс и Дајана со печатот, Вилијам рече дека тој повлекува цврста линија кога станува збор за сопственото семејство.

„Ако не сте внимателни, можете толку да се вклучите во нечиј живот што всушност ќе почнете да го растргнувате. И растејќи, видов дека со моите родители, медиумите беа толку незаситни тогаш, тешко е да се размислува за тоа сега, но тие беа многу понезаситни. Тие сакаа секој детаљ што можеа да го апсорбираат, и беа во сè, буквално насекаде. Тие знаеја работи, беа насекаде. И ако дозволите тоа да се провлече, штетата што може да ја нанесе на вашиот семеен живот е нешто за кое се заколнав дека никогаш нема да му се случи на моето семејство. И затоа заземам многу цврст став за тоа каде мислам дека е таа линија, и против оние што ја преминуваат, ќе се борам. Но, исто така, разбирам, во мојата улога, постои личен интерес; мора да соработувате со медиумите. Станува збор за тоа да знаете каде е линијата и што сте подготвени да трпите“, заклучил тој.