Целосно нови варијанти на ковид може да се појават оваа зима, соопшти агенцијата на Европската унија за лекови, но постоечките вакцини би требало да ги заштитат луѓето од сериозни исходи на болеста и смрт.

Додека ЕУ се подготвува да започне кампања за вакцинација во пресрет на бранот нови случаи на коронавирусот подоцна оваа година, Европската агенција за лекови (ЕМА) нагласила дека вирусот сè уште циркулира и брзо се развива.

– Би можело да се појави сосема нова варијанта која денес не сме во состојба да ја предвидиме – рекол шефот за вакцини на ЕМА, Марко Кавалери, на прес-конференција во петокот.

Затоа, европската стратегија е да се има широк опсег на ажурирани вакцини кои се приспособени да одговорат на новите варијанти.

ЕМА неодамна ги одобри вакцините од „Фајзер-Бионтек“ и „Модерна“ кои се приспособени да се борат со подваријантата БA.1 на омикронот.

Верзијата на „Фајзер“ ажурирана за доминантните соеви БА.4 и 5 би требало да биде одобрена во средината на септември, додека слична вакцина на „Модерна“ е, исто така, во подготовка, пишува Aljazeera.