Потврдени лошите вести: Португалија без еден од најдобрите на Мундијалот во Катар
Ливерпул во изминатиот викенд славеше голема победа во дербито против Манчестер Сити со 1:0, но сега пристигнуваат лоши вести за тимот на Јирген Клоп.
Најавите кои се појавија веднаш по натпреварот денес се и потврдени, Жота нема да настапи на Мундијалот во Катар кој започнува за нешто повеќе од еден месец. Информацијата ја потврди Јирген Клоп на денешната прес-конференција пред натпреварот против Вест Хем.
„Навистина ни е жал, лоша вест. Жота се здоби со повреда на мускулот и тоа прилично сериозна. Потребно е подолго време да се опорави и нема да игра на Мундијалот. Искрено жалам за ова момче кое со нетрпение го чекаше Светското првенство“, изјави Клоп.
Сигурно дека за Клоп ова е сериозен удар, а ќе потсетиме претходно се повреди и Луис Дијаз кој нема да се врати на терените до крајот на 2022 година.