Поранешен косовски министер смета дека оставката на градоначалниците би довело до смирување на ситуацијата на северот
Косовскиот поранешен министер за локална самоуправа Садри Ферати по повод одржувањето на нови избори во четири општини на северот на Косово изјави дека петицијата не е решение, а актуелните градоначалници треба доброволно да поднесат оставки, пренесува Клан Косова.
Ферати вели дека со доброволната оставка на актуелните градоначалници би се развил побрз процес кој би резултирал со смирување на ситуацијата и нормализирање на институциите на северот на Косово.
„Мислам дека има подобра опција од петиција, а тоа е соработката на централните институции со градоначалниците. Иако немаат силен легитимитет, тие се легални, бидејќи се избрани според сите законски процедури. Затоа, централниот институциите мора да ги убедат градоначалниците да поднесат оставки“, рече Ферати.
Тој додаде дека е неопходно изборниот процес да се одвива побрзо, бидејќи, како што вели, изборите ќе ги вратат Србите во институциите и ќе создадат нормализација на северот на Косово.
„Петицијата е во корист на Српската листа и Србија. Тие ќе одлучат дали тие 20 проценти ќе ја потпишат петицијата и ќе ја преземат заслугата за соработката, а прстот секогаш ќе биде вперен кон Приштина“, додаде Ферати.