Политичките случувања во земјава и нивните влијанија врз економскиот амбиент, како и за заштита на интересите на бизнис заедницата беа главните теми на денешната средба на претседателот Стево Пендаровски и делегација од Стопанската комора на Северна Македонија, предводена од претседателот на комората Бранко Азески и претставници од Асоцијацијата во Стопанската комора на Северна Македонија ТИМ-40.

Како што соопштија од кабинетот на Пендаровски, тој бил информиран за иницијативата за потпишување на Декларација за економски реформи, политики и мерки, којашто е поттикната од бавниот реален раст на македонската економија, кој од периодот од 1993 до 2021 година просечно годишно изнесува само 1,7 отсо.

Според претставниците на Комората постојат пет приоритетни области во нашата држава, потенцирајќи дека за создавање на стабилен и предвидлив економски амбиент неопходно е решавање на сивата економија, корупцијата, гасификацијата, решавањето на проблемите со извозните компании, издавањето на дозволите за градба и регулирање на статусот на интернет порталите – се наведува во соопштението.

Пендаровски ја поддржал иницијативата и ги поздравил напорите на бизнис заедницата. Според соговорниците, за да се унапредат севкупните економски односи, потребно е дијалог и меѓусебна соработка.