Откако неодамна беше ограден просторот, денеска започна расчистувањето на теренот, со што всушност стартуваат градежните активности за реконструкцијата на објектот на спортската сала „Партизан“ во Карпош 4.

Инвеститори на проектот се Агенција за млади и спорт и Општина Карпош, а изведувач на градежните работи е фирмата „Спектатермо“ ДОО Скопје. По целосната реконструкција на салата која е предвидено да трае 20 месеци, објектот повторно ќе биде ставен во употреба на задоволство на сите жители на општината – информираат од Општина Карпош.

Иницијативата за спас и обнова на „Партизан“, Општина Карпош ја започна на почетокот на 2019 година. По враќањето на салата во владение на општината, локалната власт во соработка со здружението „Културно ехо“ спроведе анкета за избор на идејно решение за реконструкција на салата. Идејните проекти беа подготвени од домашни и странски млади архитекти на здружението, а изборот преку анкета го направија граѓаните на Карпош. Карпошани најмногу, односно 878 гласови дадоа за идејното решение подготвено од архитектите Томас Ромеро Тали, Метју Сатори и Хавиер Ромеро.
Врз основа на овој идеен проект, Агенцијата за млади и спорт потоа го работеше основниот проект.