По иницијатива на Павле Трајанов, Уставниот суд ќе расправа за изборниот законик
Уставниот суд утре ќе ја разгледува иницијативата на Павле Трајанов, претседател на Демократскиот сојуз и пратеник, во врска со Изборниот законик со кој се фаворизираат четири партии и не се обезбедени услови за рамноправен политички натпревар, велат од ДС.
„Со иницијативата се бара укинување на законски решенија со кои на две партии од власта и две партии од опозицијата им се обезбедува 90% од медиумскиот простор, финансирање на изборна кампања, простор за реклама, како и во целина финансирањето на партиите преку партиски институти итн“, се вели во соопштението.
„Со овој закон се загризува политичкиот плурализам, што е спротивно на Уставот и воопшто на демократските правила за демократски и фер избори“, додаваат од партијата, која поради ова прашање и ја напушти владејачката коалиција.
Седницата ќе започне во 9:30 часот, во просториите на Уставниот суд“, стои во соопштението на ДС испратено до медиумите.