Редок порцелански бокал и сад за миење што ги подарила Марија Антоанета на гувернантата на кралските деца се вратени во француски замок 37 години откако беа украдени. Севрскиот порцелан го украле вооружени разбојници од замокот Тоари, 50 километри западно од Париз, во 1987 година, пишува „Гардијан“.

Детективите ги идентификувале украдените бокал и сад откако експерт за антиквитети ги контактирал за да провери дали керамиката е на списокот на исчезнати културни предмети.

Пол де Ла Панус (80), сопственик на замокот од 16. век, рекол дека губењето на вредните предмети предизвикало многу непроспиени ноќи и тој речиси се откажал од можноста да ги види повторно. Но, полицијата се јавила да каже дека го пронашла порцеланот, кој бил рачно насликан во невообичаено живи небесно сини бои.

„Тие рекоа дека ги нашле. Беше толку, толку емотивно“, изјавил Панус за дневниот весник „Паризијан“.

Како што истакнал, само околу 20 парчиња порцелан некогаш биле обоени со таа сина боја. Во ноември 1987 година, тројца вооружени разбојници осомничени за серија од повеќе од 20 кражби на стапици во одделот Ивелин во период од шест месеци, влегле во замокот Тоари, кој сега е познат по својата зоолошка градина. Тие украле неколку вредни предмети, вклучително и шест пушки што Џорџ Трети му ги подарил на Луј Шеснаесети.

Инаку, Марија Антоанета ѝ ги дала овие бокал и сад за миење на далечната роднина на Панус, Луиз-Елизабет де Кроа де Турзел, гувернанта на кралските деца.

Кога Луј Шеснаесети и кралското семејство се обиделе да побегнат од Париз во 1791 година, Де Турзел им се придружила пред сите да бидат заробени и вратени во градот. Подоцна, таа ги објавила своите мемоари, кои остануваат непроценлива приказна за последните денови на кралското семејство.