Вработените во компанијата „Драва интернатионал“ кај Осиек, чија депонија за пластика пламна во вторникот вечер и сѐ уште гори, денеска протестираат пред фабриката, бранејќи ја од обвиненијата дека е одговорна за пожарот.

Неофицијални извори вклучени во внатрешната истрага на хрватската компанија за преработка на пластика тврдат дека била исечена жицата на северната ограда на депонијата, близу до местото не кое избувнал огнот, и изразуваат сомневање дека „сѐ ѝ е наместено“. Сопственикот на компанијата Звонко Беде, пак, изјави за телевизијата „РТЛ“ дека „не се меша во тие работи“ и дека не организирал никаква истрага.

По тридневни натчовечки напори десетици противпожарни екипи го скротија огнот, но депонијата сѐ уште гори и чади.

– Ветерот постојано ја менува насоката, поради што делови од градот близу фабриката се на удари на црн чад – објави репортерот на телевизијата „Нова“.

Пожарникарот што паднал во растопена пластика е во „стабилна состојба“ по хируршката операција, но ќе остане на интензивна нега заради понатамошни операции на тешките изгореници на 30 отсто од телото.

Постојано се следи квалитетот на воздухот, водата и почвата и информациите се проследуваат до локалните жители. Експертите предупредија добро да се мијат и да се лупат земјоделските производи од местата над кои бил чадот, а добитокот да не се носи на пасење.

Сто и триесетте работници од Непал, кои живеат во контејнерска населба во кругот на фабриката, се префрлени во спортска хала во Осиек.

– Во тоа време спиев. Се разбудив во 4 часот и видов голем пожар. Ние си ја сакаме работата и својата компанија, која ни даде сѐ. Кога ни требаше работа и плата ги добивме, секогаш на време. Многу сме загрижени за нашата компанија – изјавил за „Нова“ Акас Којала, печалбар од Непал.

И додека гори депонијата во Осјек, пожар избувна во подземните простории на болницата КБЦ во центарот на Загреб. Пожарот бил изгаснат за еден час и не била потребна евакуација на пациенти.