Австрија се соочува со парадоксална состојба на пазарот на труд – покрај големата невработеност како резултат на корона-кризата, многу компании имаат потреба од работна сила. Во земјата во моментот има над 410.000 невработени, а претседателот на Австриската стопанска комора, Харалд Марер очекува бројот во сеоптември да биде поголем за 80.000 лица. Покрај тоа, 400.000 луѓе работат со скратено работно време.

– И покрај зголемената невработеност, многу компании не можат да најдат работна сила, рече Марер и додаде дека причината за тоа е што оние кои бараат работа не се таму каде што има работа.

Само во ИТ-секторот се создадени околу 20.000 работни места, а во услужните дејности недостига квалификувана работна сила, како на пример 1.300 инсталатери.

За да дојде до пад на невработеноста, Стопанската комора бара мерки од Владата, социјалните партнери и Службата за вработување.

– Квалификацијата е приоритет. Корона-кризата го отвори патот за дигитализација и образованието треба да го следи тој правец, рече генералниот секретар на Комората, Карлхајнц Копф.

Тој посочи дека занаетчиството се покажало како „поотпорно” на кризата и дека занаетчиите полесно наоѓаат работа отколку луѓето со универзитетско образование.