Се надеваме и очекуваме доследно почитување на Договорот од Преспа, како еден од критериумите за пристапниот процес на Северна Македонија во Европската Унија (ЕУ), рече портпаролот на Министерството за надворешни работи на Грција, Александрос Папајоану.

Запрашан за коментар на барањето на ВМРО-ДПМНЕ во личните карти да не биде вклучена придавката „северна”, Папајоану истакна дека не сака да коментира „што вели опозицијата во Северна Македонија”.

– Она што сакам да кажам е она што го кажа и Дендиас кога беше тука Османи. Секако се надеваме и очекуваме доследно почитување на предвиденото со Договорот од Преспа. Не би сакал да коментирам она што го кажува ВМРО во конкретниот случај, рече портпаролот на грчкото МНР.

Околу трите меморандуми со нашата земја, што од средината на септември се доставени во грчкиот Парламентот, но сè уште не се ратификувани, Папајоану кусо одговори дека нема нешто ново и „во некој момент ќе стигнат за гласање”.