Франсоа Бајру, четвртиот премиер на Франција, денеска се соочува со речиси сигурен пораз на гласањето за доверба во парламентот, што може да ја продлабочи политичката криза во земјата и неизвесноста за втората по големина економија во еврозоната.

Падот на владата би ја влошил институционалната парализа на Франција во клучен момент за Европа која се соочува со војната во Украина, растечкото влијание на Кина и трговските тензии со САД. Дополнителен ризик е и јавниот долг, кој минатата година достигна 113,9% од БДП, далеку над европските ограничувања, пишува Блумберг.

И покрај бројните разговори и јавни настапи, Бајру не успеа да обезбеди поддршка од мнозинството пратеници. Опозициските партии од левицата и десницата најавија дека ќе гласаат против него.

„Владата ќе падне“, порача Жан-Лук Меланшон од партијата Неосвоена Франција.

Доколку парламентот изгласа недоверба, претседателот Емануел Макрон повторно ќе мора да назначи нов премиер кој ќе може да обезбеди усвојување на буџетот.

Франција се наоѓа во политичка криза откако Макрон во 2024 година распиша предвремени избори кои резултираа со парламент без јасно мнозинство.