Како правилно да се грижите за красула (дрвото на пари). Како да се засадат, како да се наводнуваат и колку е комплицирано да се размножува овој вид?

Како правилно да засадите дрво на парите?

Не е многу тешко да се најде добро место за одгледување и негување на ова растение. Ако имате можност, одгледувајте го на светло место, па дури и на сонце. Ако немате услови да го одгледувате на отворено, красулата добро ќе напредува и во соба на многу светла прозорска даска. Единствено што не ѝ годи е загреан воздух, особено радијатори и парно. Не ѝ годи ниту темната позиција во собата. Растението ќе животари и нема да напредува.

За супстрат изберете комбинација од универзална земја или почва за собни видови со додавање на песок или лава топчиња за подобра дренажа и циркулација на воздухот околу корените. Можете исто така да користите подлога за кактуси наместо да додавате песок на универзалниот супстрат. Исто така, важно е и саксиите во кои одгледувате красули да имаат големи дупки (отвори) на дното за да не се задржува водата околу корените.

Како да го пресадите дрвото на пари?

Одвреме-навреме, препорачливо е да ја промените подлогата (супстратот) за да му се даде на растението нов поттик за раст. Пресадувањето не треба да го занемарите, особено кога растенијата се млади и брзо растат. Красулата пресадувајте ја на секои три години (во првите 10 години), а подоцна е неопходно пресудување на секои пет години.

Најдобро е оваа работа да ја правите напролет пред да ги ставите садниците надвор во дворот, доколку, се разбира, имате услови за тоа. Зимските месеци се мошне несоодветни за пресадување бидејќи растението мирува, не расте и тешко ќе ги регенерира оштетените корени. Ако коренот се силен и заплеткан, за пресадување изберете малку поголем сад.

Правилна нега

Сукулентите генерално не сакаат премногу влага. Затоа, секогаш треба да користите пропустлива, растресита подлога (супстрат). При наводнување следете го правилото: умерено. Навлажнета почва и коренот кој се постојано е влажен ќе предизвикаат гниење и оштетување на коренот.

Во сончевите и топлите денови, водата од супстратот испарува многу побрзо отколку во студените, облачни периоди. Со прстот лесно ќе го процените степенот на влага во почвата и ќе ја дозирате вистинската количина на вода. Воздржаноста во наводнувањето е особено важна во зима и кога растението има малку светлина.

Дрвото на пари ги апсорбира хранливите материи најдоцна до септември. За „прехранување“ изберете го оној што е наменет за сукуленти и кактуси и потхранувајте  еднаш месечно. По септември, растенијата не ги потхранувајте за да се стврднат и да влезат во зима кога растот ќе престане.

За дрвото на пари најдобро е да го помине летото на отворено на терасата. Како и секој растителен вид, тој ја чувствува промената на годишните времиња. Пред првиот мраз внесете ги растенијата во затворен простор. Исто така, редовно проверувајте ги растенијата да немаат знаци на болести или штетници. Проблемот може да биде и во почвата, бидејќи дрвото на пари го напаѓаат и вошки. Белиот прашкаст секрет е показател за нивното присуство. Обично, малку повеќе влага ќе ги избрка штетниците, а ако тоа не помогне, мора да користите инсектицид.

Како правилно да го кастрите дрвото на пари?

Дрвото на пари бара редовно кастрење и обликување за да се одржат растенијата во декоративна, уредна форма. Кастрејте го така што со остар нож отсечете дел од гранката точно над листот за на тоа место да се појават нови листови. Красулата е добар избор ако се занимавате со бонсаи.

Како да го размножите дрвото на пари?

Размножувањето на красулата е многу едноставно. Исечете ги краевите на ластарите и забодете ги во супстратот. По кратко време, ќе видите нови, млади гранчиња, што укажува на формирање на корени и почеток на нивно растење.

Зошто се одгледува дрвото на парите?

Дрвото на пари е популарно растение во затворени простории и во контејнери. Лесно се одржува и импресионира со своите зимзелени и цврсти лисја. Не е многу напорен вид за нега, па затоа се препорачува и за почетници.

Дали дрвото на парите е отровно?

Растенијата со дебели лисја се генерално нетоксични, но можат да предизвикаат благи симптоми на труење кај чувствителните луѓе поради нивната содржина на органска киселина.