Претседателката на Косово, Вјоса Османи, во саботата се сретна со цргногорскиот технички премиер, Дритан Абазовиќ, кој ја продолжи повеќедневната посета на Косово.

Односите меѓу двете земји беа оценети како одлични, а соговорниците изразија подготвеност за нивно продлабочување, соопштија од Кабинетот на косовската претседателка.

Османи го поздрави потпишаниот Договор за воздушен сообраќај меѓу Косово и Црна Гора.

Таа посочи дека Косово и Црна Гора имаат исти ставови за важноста на евроатлантските интеграции на земјите од регионот, како гаранција за мир и просперитет на Западен Балкан.

Османи рече дека Црна Гора е пријателска и партнерска земја на Косово, изразувајќи уверување дека уште повеќе ќе го поддржи Косово во напорите за зајакнување на меѓународниот субјективитет, вклучително и членството во меѓународните организации, за што ја доби поддршката на Абазовиќ.

На средбата се разговараше за последните случувања во земјата и регионот, како и за дијалогот на Косово со Србија.

Османи посочи дека Бриселскиот договор ги третира Косово и Србија како рамноправни страни во контекст на меѓудржавните односи, иако „Србија продолжува да го опструира спроведувањето на договорот“.

На средбата беше речено и дека албанската заедница во Црна Гора и црногорската заедница на Косово се моќен мост што ги поврзува двете земји.