Унгарскиот премиер Виктор Орбан изјави денеска дека критиките кон неговата земја упатени од Холандија во врска со новиот закон за правата на припадниците на ЛГБТ заедницата, „смрдат на морална надмоќ вкоренета во колонијалното минато”.

– Ова е колонијален пристап. Тие едноставно не размислуваат за тоа што можат, а што не можат да кажат за друга нација и законите на друга земја, истакна Орбан.

Лидерите на ЕУ минатата недела го критикуваа Орбан поради новиот закон со кој се забранува унгарските училишта да користат материјали за кои се верува дека ја промовираат хомосексуалноста, а холандскиот премиер Марк Руте му порача да ги почитува правата на ЛГБТ или да ја напушти ЕУ.

Владата на Орбан наведува дека законот, кој ќе стапи во сила следната недела, не е насочен против хомосексуалците, туку има за цел да ги заштити децата, чии родители, како што велат, треба да играат голема улога во нивното сексуално образование.

ЕУ побара од Орбан да го повлече законот, додека 17 од вкупно 27 лидери на земјите членки на ЕУ потпишаа писмо во кое ја потврдија нивната заложба за заштита на правата на хомосексуалците.

Руте: Кон Орбан беа упатени најжестоките критики што сум ги видел на самитите на ЕУ