Веста дека се одбиени четири општини што конкурирале со проекти за парите што централната власт ги доделува на локалната самоуправа, предизвика многубројни сомнежи и реакции во јавноста затоа што овие општини се со градоначалници од опозицијата. На чело на Општина Струмица е Костадин Костадинов од СДСМ, градоначалник на Теарце е Нухи Незири од редовите на ДУИ, а истата партиска определба е на Иљас Весељи од Сарај, додека градоначалничката на Град Скопје Данела Арсовска, иако декларирана како партиски неопределена и на локалните избори поддржана од ВМРО-ДПМНЕ, подолго време е опструирана токму од таа партија.

По низата реакции, премиерот Христијан Мицкоски најави дека на следната владина седница ќе има мало продолжување на рокот бидејќи во проектите на некои од општините е потребно дополнување на документите.

– Мислам дека рокот ќе биде разумен, до 10 или 15 ноември да ги придонесат проектите и откако тоа формално ќе биде завршено, очекувам и тие да бидат вклучени во првиот бран. Ветената сума од 6 милијарди очекуваме до крајот на годината да биде испорачана, а веќе следната година ќе има 15 милијарди, што значи од централниот буџет кон општините ќе бидат испорачани проекти од околу 21 милијарда денари – истакна Мицкоски.

Извисија 20-ина скопски проекти

Град Скопје официјално во долго соопштение наведе што се надевале дека ќе направат со парите од унгарскиот кредит, доколку им биле одобрени проектите, но и со многу остар тон ја осудија одлуката на Владата.

„Одлуката на Владата на Р Македонија да не додели средства за проектите за кои аплицираше Градот Скопје уште еднаш ја потврдува секташката ментална состојба на Владата предводена од Христијан Мицкоски. Со оваа одлука докажа дека неговата суета е поважна од која било потреба на граѓаните, а со неистомислениците се пресметува со сегрегација и политички прогон, докажувајќи дека нема никаков демократски ни лидерски капацитет“, соопштија од Град Скопје.

Оттаму велат дека градот аплицирал со целосно обезбедена документација.

„Повеќе од 20 поднесени проекти се со фокус на подобрување на јавниот превоз, развој на градската патна инфраструктура, противпожарната заштита, јавната хигиена, информациски технологии и дигитализација, како и од областа на културата“, пишува во соопштението.

Градот аплицирал за реконструкција на улица Беласица, изградба на дел од булевар Македонско-косовска бригада, повеќе кружни текови, реконструкција на булевар Србија. Поднесен е проект за 80 еколошки ЦНГ автобуси и 15 електрични автобуси, како и за нови противпожарни возила. Имало проект и за зајакнување на капацитетите на јавните претпријатија „Комунална хигиена“ и „Паркови и зеленило“, проекти за реконструкција на планетариумот и изведба и поставување трим тартан атлетска патека по должината на кејот на реката Вардар. Се аплицирало и за пари за систем за паметно мерење и управување со електрична енергија.

Според премиерот Мицкоски, проектите се некомплетни, а Градот има и неискористени пари.

– Бараат автобуси, бараат средства што се за одржување хигиена на улиците, а истовремено од Владата имаат о пренесени околу 10 милиони евра што стојат на сметката за реализација на една капитална инвестиција, тоа е булеварот „Хасан Приштина“, веќе две години и, за жал, ништо не е направено – рече Мицкоски.

Струмица ќе поднесе нови проекти

Градоначалникот на Струмица Костадин Костадинов вели дека е изненаден од одлуката на Владата, да не се одобрат пари за проектот со кој конкурирале – пазар во Струмица.
Костадинов во изјава за „Слободен печат“ нагласува дека цело време биле во комуникација со Министерството за локална самоуправа и со ресорното Министерство за транспорт и врски и дека била постигната согласност Струмица да конкурира само со еден проект, заради неговата големина – а тоа е новиот градски пазар најголем во државава што, всушност, беше и изборното ветување на ВМРО-ДПМНЕ.

Премиерот Христијан Мицкоски изјави дека Општина Струмица не доби затоа што конкурираше со проект што веќе е почнат и проект за кој веќе има избран изведувач.

– Никогаш досега во критериумите не беше споменато дека проектот треба да биде нов. Овој проект е во посебна фаза на реализација и нормално е да сакавме да искористиме пари од кредитот за кој обврска за враќање имаат сите граѓани и граѓанки. Не само Владата. Од неофицијалната изјава на премиерот видовме дека ќе има нов рок до 15 ноември. Ние сме подготвени, веќе имаме изработено 30 проекти, ќе избереме неколку. Се надевам дека овој пат нема да бидат изневерени струмичани. Ние ги претставуваме интересите на сите наши сограѓани, не само на СДСМ – изјави Костадинов.

Теарце аплицирало со приватен имејл, Сарај не добил потпис за животна средина

Во однос на одбиениот проект во Општина Теарце, премиерот Мицкоски изјави дека апликацијата за проектите била поднесена преку приватна имејл-адреса. „Слободен печат“ побара став од Општината, одговорот го чекаме.

– Еве, го повикувам градоначалникот да постапи како и сите други 79 градоначалници, има начин како сето тоа се прави – рече Мицкоски.

За Сарај, пак, Мицкоски наведе дека нема поднесена целосна документација. Градоначалникот Иљас Весељи вели дека општината ги следела сите чекори пропишани за комплетирање на техничката документација.

– Министерот за локална самоуправа на средбата одржана на 31 јули 2024 година со градоначалниците на скопските општини побара од нив да ги претстават своите приоритетни проекти за финансирање. Во оваа насока, Општина Сарај го презентираше проектот за реконструкција на патот во населеното место Ласкарци, а како резултат на тоа општината ги следеше сите чекори предвидени до комплетирање на техничката документација. Но, тогаш Министерството за животна средина и просторно планирање од 14 јули 2024 година не даде согласност за условите за планирање и тоа претставуваше пречка за финансирање на проектот за Ласкарци – вели Весељи.

Тој објасни дека општината доставила две ургенции до Министерството за животна средина, како и дека го известиле Министерството за локална самоуправа за спречувањето на реализацијата на овој проект.

– Во рокот за пријавување, покрај овој проект, нашата општина аплицираше и со проектот за реконструкција на патот од Долно до Горно Свиларе со кофинансирање за втора и трета фаза, за што техничката документација е комплетирана и има градежна дозвола – информира Весељи.