Тешко е да се замисли посложена вонредна состојба од онаа во Сирија, изјави Стефан Дујарик, портпарол на генералниот секретар на Обединетите нации, Антонио Гутереш.

Во интервју за Би-Би-Си, Дујарик истакна дека ова е земја која е во војна 12 години и во која уште пред земјотресот, постои долгорочна хуманитарна криза со повеќе од четири милиони луѓе на кои им е потребна помош.

Тој рече дека голем дел од инфраструктурата во Сирија е уништена или оштетена, вклучувајќи патишта и мостови.

„Згора на тоа, имате исклучително предизвикувачка безбедносна ситуација и имате области каде што треба да посредуваме во преговорите за пристап меѓу владата и бунтовниците, сето тоа среде зима“, додава портпаролот на ОН.

Тој посочи дека Обединетите нации се свесни за страдањата на народот во Сирија и дека не се заинтересирани за политички борби.

„Ние соработуваме со сириската влада. Во последните денови ни помогнаа во процесот на добивање визи и одобрување на ред други работи кои ни беа потребни. Меѓутоа, мораме да преговараме и со бунтовниците“, рекол претставникот на ОН, според Гардијан.

Тој додаде дека во земјотресот загинал и персоналот на ОН, кој бил ангажиран во јужна Турција и северозападна Сирија.

„Изгубивме двајца членови од нашиот персонал“, вели Дујарик.

Во Турција и Сирија, по земјотресот кој остави 5,3 милиони луѓе без покрив над главата само во Сирија, храната е итно потребна за најмалку 870.000 луѓе, предупредуваат од Обединетите нации.

Шефот на директоратот за хуманитарна помош на ОН, Мартин Грифитс оцени дека земјотресот е најлошиот настан во последните 100 години во тој регион.