Градежни машини бетонираат од албанската страна на Охридско Езеро, кај селото Тушемишта. „Охрид СОС“ објавија фотографии на Фејсбук и реагираат дека продолжува уништувањето на Езерото.

Додека албанските власти во извештајот доставен до UNESCO наведуваа некакви проекти за заштита на Охридскиот Регион, споделуваа фотографии од средби и настани, на терен деновиве се случува нешто друго. Се бетонира во Охридското Езеро, како што се гледа од фотографиите, но немаме повеќе детали, пишуваат тие.

Иако тој дел е само четири години на листата Светско наследство, велат дека ги преживува истите проблеми и притисоци како и македонскиот дел.

На средба со неколку албански организации и жители на Поградец неодамна, имавме прилика да дознаеме за одредени планови и намери кои не се усогласени со стандардите за заштита, кои би можеле да го нарушат биодиверзитетот и чудно е како се форсираат, кога албанските институции се обврзале да го заштитат светското наследство. Не попусто се препорачува од страна на меѓународните организации интегрирана заштита, ускладени закони и стандарди и интегрални планови за управување, од двете држави, се вели во објавата.