Американското Министерство за правда синоќа објави долгоочекувана серија документи поврзани со озлогласениот осуден педофил Џефри Епстин, кој беше пронајден мртов во затворска ќелија во 2019 година додека чекаше ново судење во Њујорк.

Документите открија дека некои познати имиња биле на списокот со контакти на Џефри Епстин. Меѓу нив се Мајкл Џексон, Алек Болдвин, Наоми Кемпбел, Мик Џегер, принцот Ендру, покојната Етел Кенеди, која беше мајка на Роберт Кенеди и поранешниот гувернер на Њујорк, Ендрју Куомо, пишува „Њујорк пост“.

Според „Фокс њуз“, ниту една од овие познати личности не е обвинета за злосторства поврзани со Епстин. И покрај откриените имиња, извор изјави за „Пост“ дека документите се „разочарувачки“ за оние кои очекувале подетални информации за конекциите на Епстин со политичките лидери.

Џефри Едвард Епстин бил американски финансиер и осуден сексуален престапник. Роден во Њујорк, Епстин изгради успешна кариера во финансискиот сектор, собирајќи огромно богатство и влијателни врски со политичари, бизнисмени и членови на кралски семејства.

Епстин беше осуден во 2008 година за наведување малолетнчки за проституција, но доби контроверзна спогодба за признавање вина која вклучуваше минимална затворска казна. Во 2019 година тој повторно беше уапсен под обвинение за трговија со малолетнички заради сексуална експлоатација. Сепак, пред судењето, тој беше пронајден мртов во неговата затворска ќелија, а смртта официјално беше прогласена за самоубиство.

Случајот на Епстин привлече широко медиумско внимание поради неговите врски со влијателни личности како Доналд Трамп, Бил Клинтон и принцот Ендру. Смртта на Епстин и околностите на неговиот случај остануваат предмет на бројни контроверзии и теории на заговор.