Министерката за правда на Нов Зеланд, Кири Алан (39) поднесе оставка откако сокрила сообраќајна несреќа во пијана состојба. Алан била обвинета за невнимателно возење и давање отпор при апсењето, пишува „Би-Би-Си“. Несреќата се случила синоќа во Велингтон.

Таа е четвртиот министер од кабинетот на премиерот Крис Хипкинс кој ја напушти владата од март. Парламентарните избори во Нов Зеланд ќе се одржат во октомври. По апсењето, поранешната министерка четири часа била задржана во полициска станица пред да биде пуштена на слобода. Алан допрва треба да се појави на суд.

„Алан сфати дека е невозможно таа да остане министерка“, рече новозеландскиот премиер на прес-конференција.

Алан, која исто така била министерка за регионален развој, конзервација и управување со вонредни состојби, неодамна зела слободни денови поради лични причини и се вратила на работа минатиот понеделник.

Минатиот месец таа потврди дека се разделува од партнерот. Покрај тоа, Алан се соочува со обвинувања за лоши односи со нејзиниот персонал. „Моите вчерашни постапки покажуваат дека не сум добро. Ќе размислувам за мојата иднина во политиката“, рече Алан.

Алан некогаш била миленик на Лабуристичката партија. Откако премиерката Џасинда Ардерн поднесе оставка на почетокот на оваа година, се шпекулираше дека Алан може да ја наследи.

Неколку министри ја напуштија владата на Хипкинс. Министерот за транспорт и имиграција Мајкл Вуд поднесе оставка во јуни, откако не откри потенцијален конфликт на интереси со неговиот акционер. Еден месец претходно, министерот за царина Мека Ваитири ја смени страната и се приклучи на друга партија.

Пред четири месеци, министерот за полиција Стјуарт Неш бил отпуштен откако било откриено дека им давал доверливи информации на донатори. Анкетата на јавното мислење во април предвиде тесна борба на претстојните избори меѓу централно-левичарската Лабуристичка партија и нејзината главна опозициска Национална партија.