Новогодишните и божиќни празници се ближат – а ние за радост во домот си китиме елка со лампиони и украси. Но, дали знаеме што значат боите на лампионите?

Во денешно време, декорирањето на елката и генерално на домот кога станува збор за празничната еуфорија, модерните дизајнерски решенија гравитираат од елка од скала за качување, до купче книги, украси како елени, снешковци, птици. Но, забораваме што е смислата на празникот и симболот на боите низ сите тие убави украси што ни носат радост дома.

Боите – симбол на Божиќ и Нова Година

Пред да стапи христијанството на сцена, луѓето пробувале на различен начин да го победат стравот од зимата и да му помогнат на новиот циклус раѓање и будење на природата. Боите кои најчесто недостигале во тој период, им биле најчесто употребувани во украсувањето, со цел да „повикаат “ некаква добра среќа.

Зелена – симбол на животот

Зелената е симбол на свежина, ново раѓање, и е прв симбол во декорирањето за Нова Година. Со самиот избор на дрвцето што ви го украсува домот, а тоа е зимзелената елка, пробуваме да го разбиеме сивилото кое во зима нѐ опкружува.

Црвена – силен симбол

Црвената е симбол на јаболкото кое Ева го „набрала“ од забранетото дрво. Исто така е и бојата на крвта, ново раѓање, самото раѓање, здравје. Во ритуалите за празниците, се користи и плодот на дренката, кој е интензивно црвен, а и во фолклорот се користи како синоним за добро здравје (да се биде здрав како дрен). Црвеното е најчеста боја во празничните украси и поттикнува радост.

Златна – симбол на моќ

Златна боја асоцира на Сонце, сјај. „Sol Invictus“, или непобедливо сонце е празник кој се славевл во стариот Рим, пред христијанството. Тоа е и бојата на пламенот, топлината, огнот.

Сребрена – боја на ѕвездите

Сребрената боја асоцира на треперење на ѕвездите на ладното зимско небо. Иако е поладна во однос на златната, се користи како дел од декорациите во Скандинавија и Германија.

Бела – боја на зимата

Белата боја е бојата на снегот, на зимата. Таа е потсетник за климатската состојба во деновите кога се слават овие празници и се користи како контраст на боите на животот и раѓањето.

Сина – боја на скапоценост

Сината не е толку популарна во нашата традиција на славење на празниците. Но, во Среден век била скапоцена боја и боја на раскошот, но и симбол на Дева Марија, особено во сликарството. Во голем број иконостаси нејзината облека или наметка е сина.