Новото истражување покажува дека машките близнаци најчесто биле брутално убивани во жртвени ритуали во злогласниот храм на Маите во градот Чичен Ица, Мексико пишува „Индепендент“.

Откритието е направено откако меѓународен тим на научници ги анализираше древните човечки останки пронајдени во Чичен Ица со помош на најнова технологија. Наодите, објавени во списанието „Нејчр“ (Nature), ги побиваат теориите дека девојките и жените го сочинуваат мнозинството човечки жртви во храмовите.

Чичен Ица во денешно Мексико е едно од најпознатите археолошки локалитети во Северна Америка, а градот бил моќен политички центар со векови пред доаѓањето на Шпанците. Градот е познат по својата монументална архитектура, вклучувајќи го и огромниот храм Кастиљо. Она по што е озлогласен е широко распространетата практика на човечки жртви.

Во Чичен Ица се откриени бројни физички остатоци, како и уметнички цртежи на ритуали. Пребарувајќи еден од храмовите на почетокот на 20 век, научниците открија останки на стотици жртви, како и огромен цомпантли – полици за черепи.

Но, причината и контекстот на ритуалното убиство на местото не се претходно анализирани. Она што се знаеше е дека многу од жртвите се деца и адолесценти. Иако се веруваше дека девојчињата се примарниот фокус на човечките жртви, експертите велат дека е тешко да се одреди полот од скелетите на таквите млади индивидуи само врз основа на физички преглед.

Неодамнешните анатомски анализи покажаа дека многу од жртвите всушност биле момчиња. Подземната комора, позната како чултун, откриена во 1967 година, содржела останки на повеќе од 100 деца.

Просторијата била поврзана со мала пештера, која се смета за точка на поврзување со подземниот свет. Експертите сега спроведоа детална генетска истрага на останките на 64 деца кои биле ритуално убиени.

Датирањето покажа дека просторијата била користена како мртовечница во период од 500 години, од седмиот до дванаесеттиот век, но дека повеќето од откриените остатоци датираат од 800 до 1000 година, односно политичкиот врв на Чичен Ица.

Генетските анализи покажаа дека сите деца чии останки таму биле депонирани се момчиња. Анализите покажаа и дека децата потекнуваат од локалното население на Маите и дека најмалку четвртина од децата се во роднинска врска со друго дете. Младите роднини имале сличен начин на исхрана, што покажува дека веројатно пораснале заедно во ист дом.

Коавторката на студијата д-р Кетрин Нагеле од Институтот за еволутивна антропологија „Макс Планк“ вели дека на сечие изненадување откриле и два пара идентични близнаци. Поради оваа причина, тие веруваат дека сродните машки деца најчесто се избираале во парови за ритуални жртви.