Истражување слично на оние што ги спроведе Шерлок Холмс откри заборавен метод за добивање на впечатливата сина боја на древните Маи. Методот е различен од оној што го користеле Маите и е сосема различен од претходниот метод откриен пред речиси 20 години од истиот истражувач.

Сината боја на Маите е откриена во 1931 година, а научниците веднаш утврдија дека станува збор за пигмент што не е лесен за добивање. Сината боја слична со онаа на небото се користела за боење на сè, од грнчарија до човечки жртви во доцниот прекласичен период, кој траел од 300 година п.н.е. до 300 година од н.е., објавува „Лајв саенс“ (LiveScience).

Сината боја на Маите е многу необична бидејќи е мешавина од органско индиго сино и неоргански минерал од глинениот палогорскит. Богатата сина боја не бледнее со текот на времето – преживеала и покрај суровите услови на тропските шуми на јужно Мексико и Гватемала, каде што потекнува древната цивилизација на Маите.

Научниците со децении се обидуваат да го откријат прецизниот метод за производство на сината боја на Маите, но успеаја дури во 2008 година. Со анализа на траги од пигмент на грнчарија и на дното на бунар во Чичен Ица, локалитет во Јукатан, истражувачки тим предводен од Дин Арнолд, кустос по антропологија во музејот во Чикаго, утврди дека клучот за добивање на бојата е во копалот. Со загревање на мешавина од индиго, копал и палогорскит на оган, Маите произвеле уникатен пигмент.

На годишниот состанок на Друштвото на американски археолози во Денвер, Арнолд го претстави откритието и на друг метод за производство на сина боја на Маите. Истражувањето беше објавено во неговата книга „Мајанска сина“.

По детално испитување на неколку садови на Маите во Чичен Ица, Арнолд сфатил дека белата трага во нив веројатно е палогоскит кој бил мелен кога бил влажен, што оставило траги во ситните пукнатини во садовите за мелење. Микроскопската анализа на 12 садову, исто така, откри мали, изгорени растителни пупки, како и фактот дека садовитесе загревале одоздола, покажа неговата „детективска работа“.

– На крајот, овие набљудувања дадоа докази дека Маите го користеле овој метод како друг начин за добивање сината боја. Но, сината боја на Маите не е само убава боја. Тоа е културното наследство на Маите. Ова е генијално откритие и знаењето било ограничено на специјалисти како свештеници – изјавил Арнолд за „Лајв саенс“.

Тој додал дека сината боја на Маите била особено важна во жртвувањата на богот Чак за време на периоди на суша.