Нова студија открива: Сексот и оргазмот пред спиење може да ви помогнат побрзо да заспиете
Партнерскиот секс кој води до оргазам го намалува времето потребно на мажите и жените да заспијат и го подобрува квалитетот на сонот, според наодите објавени неодамна во „Џурнал оф слип рисрч“ (Journal of Sleep Research).
Сексуалната активност без оргазам и мастурбацијата (со и без оргазам) не се поврзани со промените во сонот, покажа студијата, пренесува „Њујорк пост“.
„Сегашните студии значително ги потврдуваат наодите кои укажуваат дека сексуалната активност и интимноста може да го подобрат спиењето и целокупната благосостојба и кај мажите и кај жените и да послужат како директива за идните истражувања“, напишаа авторите на студијата.
Научниците од Универзитетот во Гронинген во Холандија имаа 256 учесници, главно студенти, кои воделе дневник со детали за нивниот сон и сексуална активност во текот на 14 дена. Во предвид биле земени и консумирањето алкохол, менструалниот циклус и „невообичаените настани“ кои се случиле пред спиење.
Истражувачите откриле дека на луѓето кои имале партнерски секс и доживеале оргазам им биле потребни во просек 16 минути да заспијат, во споредба со 17 минути за оние кои имале секс и не доживеале оргазам и 20 минути за оние кои немале секс.
За оние кои мастурбирале, просечното време за заспивање било 26 минути. Тоа време било скратено на 19 минути доколку личноста постигне оргазам. Тоа било 20 минути за оние кои не мастурбирале.
Научниците забележале дека доживувањето оргазам резултира со ослободување на окситоцин, наречен „хормон на љубовта“ и пролактин, хормон кој предизвикува развој на градите, го поттикнува производството на млеко и влијае на сексуалното и репродуктивното здравје.
„Зголемениот ефект на партнерскиот секс може делумно да се објасни со зголемените невроендокрини промени во оргазмот предизвикани од сексуален однос, во комбинација со вредните ефекти од доживувањето интимност со партнерот“, напишаа авторите на студијата.
Според едно минато истражување, доживувањето одличен оргазам всушност може да биде нешто што сте го наследиле од вашите родители.
За жал, во истаржување спроведено во 2020, беше откриено дека четворица од 10 Американци никогаш не доживеале оргазам.