Норвежанките се пресилни, прв пораз на Хрватска
По четири победи на Европското првенство со кои стана инстант сензација, селекцијата на Хрватска денеска е поразена од првиот фаворит за титулата Норвешка со 36:25.
Хрватските ракометарки беа достоен ривал 40-тина минути, дури имаа и водство во второто полувреме, но Норвежанките покажаа зашто се главен фаворит за титулата.
Во последните 20-тина минути Норвежанките направија серија од 13:2 со која од 18:18 остварија дојдоа до убедливи 31:20 со што ги решија дилемите околу победникот и рутински го завршија натпреварот.
Риштад со седум, Офтедал со шест, Мерк и Кристиансен со пет гола ја предводеа Норвешка со петтата победа во петтиот натпревар на ЕП кое се игра во Данска, додека во редовите на Хрватска се истакна Мичијевиќ со седум постигнати голови.
Хрватска во последното коло ја очекува директен дуел за второто место од групата 2 кое носи во полуфиналето против Германија. На „коцкестите“ ќе им биде доволен и еден бод против Германија која денеска беше поуспешна од Унгарија победвајќи ја со 32:25.
Лидер на табелата во групата 2 е Норвешка со максимални осум бода, Хрватска е втора со шест додека Германија има четири бода.