Нобеловата награда за хемија денес им беше доделена на научници од Јапонија, Австралија и САД, Сусуму Китагава, Ричард Робсон и Омар М. Јаги, за развој на „метално-органски рамки“, објави Кралската шведска академија на науките, пренесува Гардијан.

Тројцата лауреати создадоа молекуларни структури со големи простори низ кои можат да течат гасови и други хемикалии.
Овие структури, метално-органски рамки, можат да се користат за собирање вода од пустинскиот воздух, заробување на јаглерод диоксид, складирање на токсични гасови или катализирање на хемиски реакции.

Оваа награда, доделена вкупно 116 пати од 1901 година, досега ја освоиле 197 лауреати.

Најмладиот добитник на наградата за хемија имал 35 години – Фредерик Жолио, во 1935 година, а најстариот добитник бил Џон Б. Гуденаф, кој ја добил наградата во 2019 година, на 97-годишна возраст.

Научниците Фредерик Санг и Бери Шарплес двапати ја освоиле Нобеловата награда за хемија.

Минатата година, Нобеловата награда им беше доделена на биохемичарот од Универзитетот во Сиетл, Дејвид Бејкер, како и на Демис Хасабис и Џон Џампер, научници од Google DeepMind, британско-американска лабораторија за истражување на вештачка интелигенција со седиште во Лондон.

Тројцата беа наградени за нивното откривање на техники за декодирање и дизајнирање нови протеини.

Нивната работа користела напредни технологии, вклучувајќи вештачка интелигенција, и има потенцијал да го трансформира начинот на кој се прават нови лекови и други материјали.

Првата Нобелова награда за 2025 година беше објавена во понеделник.

Наградата за медицина им припадна на научниците Мери Е. Бранкоу, Фред Рамсдел и д-р Шимон Сакагучи за нивните откритија во областа на имунологијата.
Наградата за физика им припадна на Џон Кларк, Мишел Х. Девор и Џон М. Мартинис за нивното истражување на чудниот свет на субатомското квантно тунелирање што ја унапредува моќта на секојдневните дигитални комуникации и компјутери.

Добитникот на Нобеловата награда за литература ќе биде објавен утре, наградата за мир во петок, а наградата за економија следниот понеделник.

Церемонијата на доделување на наградите ќе се одржи на 10 декември, на годишнината од смртта на Алфред Нобел, основачот на наградата.

Нобел беше богат шведски индустријалец и пронаоѓач на динамит.

Почина во 1896 година.