Капитенот на македонската одбојкарска репрезентација Никола Ѓоргиев (34) имаше напорна клупска сезона, како предводник на тимот АЦБ Волеј Љубљана го освои Првенството и Купот на Словенија и титулата во средноевропската МЕВЗА лига. Сега пред него се настапите во македонската репрезентација, прво во Европската златна лига, а потоа и она најважното, Европското првенство 2023, кое ќе се одржи во Македонија.

Никола вели дека е уморен од битките на повеќе фронтови на клупски план, но, националниот дрес на Македонија е друга димензија, за која тој и соиграчите даваат сто отсто, колку и да се уморни.

В сабота Македонија на гости во Лоѓ, Полска, ја отвора сезоната во Златната лига, во меч со Украина, под водство на новиот селектор Јошко Миленкоски. Ѓоргиев вели дека целата репрезентација е супер-задоволна од подготовките со Миленкоски, а фокусот е на ЕП 2023 во август и во септември.

– Супер течат подготовките. Сите заедно сме презадоволни од селекторот Миленкоски. Големо задоволство е да се работи со таков голем стручњак. Мислам дека ќе успееме добро да се подготвиме за она главното, а тоа е Европското првенство – вели Ѓоргиев.

На него клупската сезона остави трага, но, тоа не му е непозната ситуација.

– Така е во последните 18 години за мене. Националниот дрес е светост, тоа е друга димензија. Секогаш гордо и со голема љубов и среќа го носам националниот дрес. Истоштен сум. Малку повеќе сум уморен, сега веќе и годините ме стигаат. Меѓутоа кога се работи за националниот дрес, нема изговори. Ќе се бориме максимално, ќе се трудиме да испишеме нова страница во историјата на македонската одбојка – вели капитенот.

Украина ќе биде тежок противник в сабота.

– Се надевам дека Украина нема да биде комплетна како што беше лани на Светското првенство. Го гледав мечот на Украина со Словенија од четвртфиналето. Водеа 1-0, но изгубија со 1-3. Ако е комплетна, Украина ќе биде фаворит во нашата група, па можеби и фаворит за титулата во Златната лига. Од сите репрезентации од Европската златна лига, тие стигнаа најдалеку на Светското првенство минатиот септември – вели Ѓоргиев.

Формата се темпира за Европското првенство

– Нашите планови на оваа Златна лига не се да атакуваме на медал, како сите седум минати настапи во ова натпреварување. Сега не е атак на медал, туку целта е подобрување на нашата игра, запознавање на новиот Стручен штаб со играчите и нивните карактеристики, за да можеме на Европското првенство да го достигнеме зенитот. Ако порано зенитот ни беше на „фајнал фор“ на Европската лига, сега зенитот на формата треба да ни биде на она најбитното, август и септември, на Европското првенство 2023 – вели Ѓоргиев кој вели дека тимот ќе искористи секоја шанса да постигне што повисок пласман и во Златната лига, иако акцентот е на ЕП.

По мечот со Украина в сабота, Македонија ќе игра серија мечеви дома-гости со Хрватска и со Белгија од групата „Б“ од оваа лига на ЦЕВ, што ќе завршат на 18 јуни на домашен терен против Украина. Завршниот турнир фајнал-фор е во Задар на 24-25 јуни.
На Европско првенство од 28 август и до 16 септември Македонија е еден од четирите домаќини, заедно со Италија, Бугарија и со Израел. Во Скопје ќе се игра групата „Ц“, во која се и Полска, Холандија, Чешка, Црна Гора, Данска. Првите четири селекции од секоја од четирите групи ќе се пласираат во осминафиналето.