Немири во Париз поради забраната за пропалестински протести, демонстрантите извикуваа „Израел убиец“ и „Макрон соучесник“
Француската полиција употреби солзавец и водени топови за да ги растера пропалестинските демонстранти вечерва во Париз, откако полицијата соопшти дека вакви собири се забранети.
И покрај забраната, неколку стотици пропалестински демонстранти се собраа во центарот на Париз во одделни групи, чие спојување полицијата се обиде да го спречи.
Демонстрантите извикуваа „Израел убиец“ и „Макрон соучесник“, додека францускиот претседател Емануел Макрон претходно го осуди нападот на палестинската организација Хамас и изрази солидарност со Израел.
Францускиот министер за внатрешни работи Жералд Дарманин претходно најави забрана за сите пропалестински демонстрации во земјата.
Тој рече дека еврејските училишта и синагоги треба да бидат заштитени со видливо полициско присуство, а членовите на францускиот парламент добија и полициска заштита поради растечкиот антисемитизам.
Забраната за пропалестински демонстрации во Франција беше објавена поради загриженоста меѓу европските земји за зголемениот антисемитизам поттикнат од конфликтот меѓу Израел и Хамас.
И германската полиција предходно ги растера пропалестинските демонстранти во Берлин.