Американската актерка Кристин Дејвис, позната по улогата Шарлот во серијата „Sex And the City“, изјави дека не сака да се вмеша во расправијата меѓу нејзините колешки Ким Катрал (Саманта) и Сара Џесика Паркер (Кери), пишува „Пејџ сикс“.

Повторното обединување на актерската екипа од „Sex And the City“ се случи во 2021 година, во продолжението на серијата „And Just Like That…“, во кое го немаше ликот Саманта. Веста дека Ким Катрал ќе ја репризира легендарната улога и ќе се појави во втората сезона на „And Just Like That…“ беше објавена на крајот на минатиот месец.

„Мора да ги почитувате желбите на луѓето. Нема да ја трошам мојата енергија на тоа. Не можам да сменам никого“, изјави Дејвис за „Телеграф“, за тензијата меѓу нејзините колешки.

„Разбирам дека обожавателите се вознемирени… Да можев ќе го поправев тоа. Но, не можам, тоа не е во моја моќ“, додаде таа.

Ким Катрал неодамна сними сцена за претстојната втора сезона на серијата „And Just Like That“, пренесува „Пост“. Втората сезона од серијата ќе почне да се емитува на 22 јуни, а третата сезона сѐ уште не е потврдена.

Како потсетување, несогласувањата меѓу Катрал и Паркер започнаа во 2010 година по објавувањето на вториот дел од филмот „Sex And The City“. Наводната причина за конфликтот е тоа што Катрал одбила да глуми во третиот филм и рекла дека не се дружела со нејзините колешки и дека никогаш не биле пријателки.

Ситуацијата се влоши кога Паркер ѝ изрази сочувство на Катрал, по смртта на нејзиниот брат во 2018 година.

„Сара Џесика Паркер, не ми треба твојата љубов и поддршка во овие тешки времиња. Да расчистиме, ако не сме го направиле тоа досега. Ти не си ми семејство. Не си ми пријателка. Ти го пишувам ова за последен пат, за да престанеш да ја искористуваш нашата трагедија за да ја задржиш својата репутација на ‘добра девојка’“, ѝ одговори Катрал на Паркер.