Веројатно секој што слушал музика во живо може да потврди дека звучи многу подобро отколку кога ја слушаме истата музика, на пример, преку телефонот на слушалките.

Концертите на нашите омилени бендови можат дури и да нè расплачат кога свират на сцената. Научниците од Швајцарија направија истражување и го најдоа одговорот зошто сме толку емотивни кога слушаме музика во живо, пишува „Њу саентист“ (New Scientist).

Слушањето музика во живо може да биде повозбудливо од слушањето снимена музика бидејќи предизвикува поголема активност во делот од мозокот поврзан со обработката на емоциите.

Саша Фрухолц од Универзитетот во Цирих во Швајцарија и неговите колеги компонирале 12 музички дела во времетраење од 30 секунди. Половина од композициите се напишани со цел да се пренесат негативни емоции, како тага и гнев. Тие се побавни, помалку хармонични и содржат повеќе помали акорди од другите песни, напишани за да предизвикаат позитивни емоции.

Тие потоа регрутирале 27 луѓе, кои немале музичка обука, да ги слушаат овие 12 дела двапати – еднаш како изведба во живо на пијанист, кој учесниците го слушале преку звучници и еднаш на аудио снимка.

Редоследот по кој се слушале бил по случаен избор, со 30 секунди молчење меѓу лентите. Учесниците не знаеле кога ја слушнале снимката и кога ја слушнале музиката во живо.

Додека слушаа музика, тие лежеа во скенер за магнетна резонанца за да може тимот да ја следи нивната мозочна активност. На пијанистот му било кажано да ја прилагоди јачината и брзината на музиката според оваа активност. На пример, ако мозочната функција на учесникот покажува мала активност како одговор на позитивна музика, тој можеби свирел погласно.

„Снимената музика не е приспособлива на тоа како слушателот реагира, но кога пијанистот свири во живо, тој често ја прилагодува музиката на публиката за да го добие најдобриот одговор од неа“, вели Фрухолц.

Истражувачите открија дека живите изведби на негативни и позитивни композиции доведуваат до зголемена активност на мозокот во левата амигдала – мозочен регион силно поврзан со припишување сензорни стимули на одредени емоции (како звуци).

Во меѓувреме, снимените мелодии предизвикуваат многу помалку и многу повеќе неконзистентна активност во левата амигдала. Тоа одговараше на тоа колку „емотивно“ учесниците го оценија секое музичко парче по експериментот, пишува „Њу саентист“ (New Scientist).

„Наодите покажуваат дека музиката во живо го подобрува нашиот емоционален одговор, веројатно поради нејзината слободна, динамична природа“, вели Фрухолц.

Истражувачите се надеваат дека ќе го повторат експериментот со поголема публика на концертен амбиент.

„Ако одите на концерт во живо, не сте сами“, вели Фрухолц и додава дека „ова засилено емоционално искуство е и социјално искуство“.