Научниците ги анализираат мирисите на вселената – од најблиските соседи на Земјата до планетите оддалечени стотици светлосни години – за да дознаат повеќе за составот на Универзумот.

Јупитер, вели Марина Барсениља, „е како смрдлива бомба“.

Јупитер, најголемата планета во Сончевиот систем, има неколку слоеви облаци, објаснува таа, и секој слој има различен хемиски состав. Гасниот џин би можел да ве намами со слаткиот мирис на своите „отровни марципански облаци“, вели таа. Потоа мирисот „само би се влошувал како што одите подлабоко“.

„Веројатно би посакале да сте мртви пред да стигнете до точката каде што притисокот ќе ве здроби“, вели тој.

„Веруваме дека горниот слој од облаци е направен од амониумски мраз“, вели Барсениља, споредувајќи ја смрдеата со мачкина урина. „Потоа, како што одите подлабоко, наидувате на амониум сулфид. Потоа имате амонијак и сулфур заедно – комбинација направена во пеколот“. Познато е дека сулфурните соединенија се одговорни за смрдеата на расипаните јајца, пишува Би-би-си.

Ако би можеле да истражувате уште подлабоко, продолжува таа, ќе наидете на препознатливите ленти и вртлози на Јупитер.

„Јупитер ги има тие дебели ленти кои се обоени. Мислиме дека некои од тие бои би можеле да бидат произведени од облак од амонијак и фосфор. Исто така, потенцијално постојат некои органски молекули наречени толини, сложени органски молекули поврзани со бензин. Значи, Јупитер„, вели таа, „може да има и нота на нафта со примеси на лук“.

Барсениља е вселенски научник, дизајнер на мириси и докторанд по астробиологија на Универзитетот Вестминстер во Лондон. Во нејзините рани години од истражувањето на вселената, таа постојано се прашувала: „Како би мирисала вселената?“

Па, покрај нејзината академска работа – потрага по знаци на живот на Марс – Барсениља била зафатена со дизајнирање мириси кои го рекреираат мирисот на вселената за најновата изложба на Природонаучниот музеј во Лондон.

„Од смрдеа на расипани јајца до сладок мирис на бадеми, вселената е изненадувачки смрдливо место. Кометите, планетите, месечините и гасните облаци би имале свој уникатен мирис ако можевме да ги помирисаме со носот“, вели Барсениља.