Наставници излегоа на протест: „Не сакаме спојување на повеќе предмети во еден!“
Наставниците денеска излегоа на протест организиран од Независниот синдикат за образование и наука. Тие се незадоволни што од следната учебна година предметите географија, историја, хемија, физика, биологија, етика, граѓанско образование, информатика и техничко образование – ќе се спојат во неколку предмети. Наставниците побараа да се почитуваат нивните колективни договори. Тие стравуваат дека поради спојувањето на неколку предмети во еден, ќе има наставници што ќе останат без работа и ќе бидат технолошки вишок.
Дополнително, присутните наставници изјавија дека со спојувањето на повеќе предмети во еден, нивниот професионален интегритет ќе биде нарушен, односно секој ќе треба да специјализира за се и ќе станат како што рекоа „општи работници“.
„Незадоволни сме и од непочитувањето на колективните договори во секторот образование. Во моментов најниската плата за најнизок степен на сложеност изнесува 12.000 денари (НЕТО), а сведоци сме дека минималната плата во државата изнесува 20.175 денари (НЕТО). Министерството за образование и наука нема слух ниту волја да ги почитува законите, а паралелно на сето тоа, сведоци сме како јавните функционери ЕКСПРЕСНО ја спроведоа одлуката на уставниот суд и добија покачување за 78 проценти. За јавните функционери законот е закон и тој мора да се почитува, а за просветните работници не важат истите правила, велат од Синдикатот.
Маршот на наставниците почна во 12 часот од Жена парк, а заврши пред министерството за образование и наука.